លោកប្រធានាធិបតី វ៉ូឡូមៀ ហ្សេឡិនស្គី ( Volodymyr Zelenskyy) បាន​ជួប​ជាមួយ​រដ្ឋ​មន្ត្រី​ការ​បរទេស​ប៉ូឡូញ លោក Radosław Sikorski ដែលកំពុង​បំពេញ​ទស្សនកិច្ច​លើក​ដំបូង​ទៅ​កាន់​ទីក្រុងគីវ ក្នុងតួនាទីនេះ។

លោកហ្សេឡិនស្គី បានបញ្ជាក់​ពីសារៈសំខាន់​នៃ​ដំណើរ​ទស្សនកិច្ច​លើក​ដំបូង​របស់​រដ្ឋ​មន្ត្រី​ការ​បរទេស​ប៉ូឡូញ ដែលទើបតែងតាំងថ្មី ទៅកាន់ប្រទេសអ៊ុយក្រែន។

លោកបានសម្តែងការដឹងគុណចំពោះការគាំទ្រយ៉ាងសំខាន់របស់ប៉ូឡូញសម្រាប់អ៊ុយក្រែន ក្នុង​ការទប់ទល់នឹងការឈ្លានពានដ៏ពេញទំហឹងរបស់រុស្សី និងផ្តល់ជម្រកដល់ពលរដ្ឋអ៊ុយក្រែន ដែល​ភៀស​ខ្លួន​ពីអរិភាពនេះ។

យោងតាមការិយាល័យប្រធានាធិបតីអ៊ុយក្រែន លោកហ្សេឡិនស្គី និងលោក Sikorski បាន​ព្រម​ព្រៀង​គ្នាថា «ទំនាក់ទំនងទ្វេភាគី គួរតែស្វែងរកកម្លាំងរុញថ្មី ហើយការព្រួយ​បារម្ភ​គ្រប់​ផ្នែក​ទាំង​អស់ គួរតែត្រូវបានដោះស្រាយ ដោយការជឿទុកចិត្ត និងការគោរពគ្នាទៅវិញទៅមក»៕