ហ្កាហ្សា ៖ ប្រជាជននៅតំបន់ហ្កាហ្សាស្ទ្រីប ដែលហែកហួរដោយសង្រ្គាមបាននិងកំពុងជួបការលំបាកដើម្បីទទួលបានអាហារ ហើយបានងាកទៅរកអង្គការសប្បុរសធម៌ក្នុងស្រុកដើម្បីទទួលបានការចែកចាយអាហារ ខណៈដែលការវាយលុករបស់អ៊ីស្រាអែល នៅក្នុងតំបន់នេះនៅតែបន្តពង្រីក។ 

នៅក្នុងទីក្រុង រ៉ាហ្វាហ្វ ភាគខាងត្បូងតំបន់ហ្កាហ្សាស្រ្ទីប ដែលនៅជិតខាងអេហ្ស៊ីប ប្រជាជនដែលជម្លៀសខ្លួនបានប្រមូលផ្តុំគ្នានៅកន្លែងចែកអាហារដែលគ្រប់គ្រងដោយអង្គការសប្បុរសធម៌ក្នុងស្រុក ដោយកំពុងអង្វរករសុំបបរក្តៅសម្រាប់បរិភោគក្នុងរដូវរងាដ៏ត្រជាក់នេះ។

ជនភៀសខ្លួនភាគច្រើនមកពីភាគខាងជើងនៃតំបន់ហ្កាហ្សា ជាទីដែលការវាយប្រហាររបស់អ៊ីស្រាអែលកាន់តែខ្លាំងក្លា។ ដោយសារវាមានការលំបាកខ្លាំងណាស់ក្នុងការទទួលបានស្បៀងអាហារនៅក្នុងតំបន់ដែលហែកហួរដោយសង្រ្គាមនេះ ប្រជាជនភៀសខ្លួន រួមទាំងកុមារ មិនអាចមានលទ្ធភាពទិញអាហារ និងគ្មានជម្រើសអ្វីក្រៅពីទទួលការចែកចាយស្បៀងអាហារនោះទេ។ 

នៅក្នុងឆ្នាំងអាលុយមីញ៉ូមដ៏ធំជាច្រើន បបរដែលមានតែសណ្តែក និងកម្ទេចអង្ករ ដែលជាអាហារដ៏ពេញចិត្តសម្រាប់ជនភៀសខ្លួន ត្រូវបានចម្អិនជារៀងរាល់ថ្ងៃ។ ដោយសារមនុស្សមួយចំនួនធំនឹងមកទទួលបបរជារៀងរាល់ថ្ងៃ បុគ្គលិកសប្បុរសធម៌ត្រូវបំបែកហ្វូងមនុស្សដោយប្រើរនាំងដែក។ កុមារជាច្រើនត្រូវបានគេមើលឃើញលើកដៃកាន់ចានទទេ ស្រែក និងអង្វរសុំបបរមួយស្លាបព្រាដើម្បីបរិភោគ៕