ឥណ្ឌូណេស៊ី ៖ កម្មករ ១៣នាក់ត្រូវបានសម្លាប់ និងមនុស្ស ៣៨នាក់ បានរងរបួសនៅថ្ងៃអាទិត្យ (២៤ ធ្នូ) នេះនៅក្នុងការផ្ទុះឡដុតដែកនីកែល ដែលជាកម្មសិទ្ធិរបស់ក្រុមហ៊ុនដែកអ៊ីណុក ស៊ីងសាន (ITSS) ឥណ្ឌូនេស៊ីនៅលើកោះ ស៊ុឡាវ៉េស៊ី (Sulawesi) នេះបើយោងតាមម្ចាស់សួនឧស្សាហកម្ម ជាទីដែលរោងចក្រឡដុតនេះស្ថិតនៅ។

ឧទ្យានឧស្សាហកម្មឥណ្ឌូណេស៊ី ម៉ូរ៉ូវ៉ាលី (IMIP) បាននិយាយនៅក្នុងសេចក្តីថ្លែងការណ៍មួយថា ការផ្ទុះនេះបានកើតឡើងនៅពេលកម្មករកំពុងជួសជុលឡ និងដំឡើងបន្ទះឡដុតនៅម៉ោង ៥:៣០នាទីព្រឹកថ្ងៃអាទិត្យ (ម៉ោងក្នុងស្រុក) ដោយបានសម្លាប់កម្មករឥណ្ឌូនេស៊ី ៨នាក់ និងកម្មករចិន ៥នាក់ ។ អគ្គិភ័យនេះត្រូវបានពន្លត់នៅវេលាម៉ោង ០៩:១០នាទីព្រឹកម៉ោងក្នុងស្រុក ។

ដែកនីកែលបានក្លាយទៅជាមានសារៈសំខាន់កាន់តែខ្លាំងឡើងសម្រាប់ប្រទេសឥណ្ឌូនេស៊ី ដែលសម្បូរដោយធនធាន និងដែលជាអ្នកផលិតនីកែលដ៏ធំបំផុតរបស់ពិភពលោក ជាមួយនឹងការវិនិយោគសកលរាប់ពាន់លានដុល្លារបានហូរចូលបន្ទាប់ពីរដ្ឋាភិបាលបានហាមឃាត់ការនាំចេញរ៉ែដែលមិនទាន់កែច្នៃក្នុងឆ្នាំ២០២០។ 

ទោះជាយ៉ាងណាក៏ដោយ គ្រោះថ្នាក់ដ៏ធ្ងន់ធ្ងរជាច្រើនបានកើតឡើងនៅក្នុងឧស្សាហកម្មកែច្នៃនីកែលរបស់ប្រទេសឥណ្ឌូនេស៊ី នៅក្នុងប៉ុន្មានឆ្នាំថ្មីៗនេះ៕