អូស្ត្រាលី ៖ ផ្នែកមួយចំនួនធំនៃប្រទេសអូស្ត្រាលី នៅថ្ងៃអាទិត្យ (២៤ ធ្នូ) នេះកំពុងទប់ទល់នឹងរលកកម្ដៅ ខណៈដែលក្រុមអាជ្ញាធរបានព្រមានអំពីហានិភ័យចំហេះព្រៃនៅក្នុងផ្នែកជាច្រើននៃរដ្ឋ វេស្ទើនអូស្ត្រាលី ដ៏ធំរបស់ប្រទេសនេះ។

អ្នកព្យាករណ៍អាកាសធាតុរបស់ប្រទេសនៅថ្ងៃអាទិត្យ បានចេញការជូនដំណឹងអំពីរលកកម្ដៅសម្រាប់រដ្ឋភាគខាងលិចមួយនេះ ដែនដីភាគខាងជើងដែលនៅជិតខាង និងរដ្ឋឃ្វីនស៍លែន (Queensland) ភាគខាងកើត ដោយព្រមានថាសីតុណ្ហភាពនៅក្នុងតំបន់ខ្លះអាចឡើងដល់ប្រហែល ៤៥អង្សាសេ។

ភាគខាងកើតនៃប្រទេសអូស្ត្រាលី ក្នុងខែនេះត្រូវទទួលរងកម្ដៅខ្លាំងដោយសារបាតុភូតអាកាសធាតុក្ដៅ អ៊ែលនីញ៉ូ ជាគំរូអាកាសធាតុដែលសីតុណ្ហភាពក្តៅមិនធម្មតានៃមហាសមុទ្រប៉ាស៊ីហ្វិក បង្កឱ្យមានរលកកម្ដៅ ព្យុះស៊ីក្លូន គ្រោះរាំងស្ងួត និងចំហេះព្រៃ។ នៅរដ្ឋ វេស្ទើនអូស្ត្រាលី ចំហេះព្រៃជាង ២០កន្លែងបានកំពុងបន្តឆាបឆេះនៅថ្ងៃអាទិត្យ នេះបើយោងតាមទីភ្នាក់ងារសេវាសង្គ្រោះបន្ទាន់របស់រដ្ឋនេះបាននិយាយនៅលើគេហទំព័ររបស់ខ្លួន។

នាយកដ្ឋានពន្លត់អគ្គិភ័យ និងសេវាសង្គ្រោះបន្ទាន់បានព្រមានពីគ្រោះថ្នាក់ចំហេះព្រៃខ្ពស់សម្រាប់តំបន់ជាច្រើននៃរដ្ឋវេស្ទើនអូស្ត្រាលី ហើយបាននិយាយថា អ្នកពន្លត់អគ្គិភ័យជាង ១.០០០នាក់ បានកំពុងប្រយុទ្ធនឹងអណ្តាតភ្លើងនៅទូទាំងរដ្ឋក្នុងរយៈពេល ៥ថ្ងៃកន្លងមកនេះ៕