ការវាយប្រហាររបស់អ៊ីស្រាអែលដែលបានចាប់ផ្តើមប៉ុន្មានម៉ោងមុនពាក់កណ្តាលអធ្រាត្រ បាន​បន្ត​ឈាន​ចូល​ដល់ថ្ងៃបុណ្យណូអែលនៅថ្ងៃចន្ទទី២៥ខែធ្នូនេះ ។ អ្នកស្រុក និងប្រព័ន្ធផ្សព្វផ្សាយ​ប៉ាឡេស្ទីន​បាន​និយាយថា អ៊ីស្រាអែលបានបង្កើនការបាញ់ផ្លោងតាមអាកាស និងថ្មើរ​ជើង​ដាក់​គោល​ដៅលើ ជំរំជនភៀសខ្លួន អាល់ ប៊ូរ៉េច (al-Bureij) នៅកណ្តាលតំបន់ហ្កាហ្សា។   

អ្នកនាំពាក្យក្រសួងសុខាភិបាលលោក អាស្រាហ្វ អាល់ គីដ្រា (Ashraf Al-Qidra) បាន​និយាយ​ថា មនុស្សយ៉ាងហោចណាស់ ៧០ នាក់​បាន​ស្លាប់​នៅ​ក្នុង​ការ​វាយ​ប្រហារ​តាម​អាកាស​របស់​អ៊ីស្រាអែល​ដាក់​គោលដៅលើទីក្រុង ម៉ាហ្កាហ្ស៊ី (Maghazi) នៅកណ្តាលតំបន់ហ្កាហ្សា ដោយ​បន្ថែម​ថា អ្នកស្លាប់ ភាគច្រើន ជាស្ត្រី និងកុមារ។  

កងទ័ពអ៊ីស្រាអែលបាននិយាយថា ខ្លួនកំពុងពិនិត្យឡើងវិញលើរបាយការណ៍នៃឧបទ្ទវហេតុ នៅ​ទីក្រុង ម៉ាហ្កាហ្ស៊ី ហើយបានប្តេជ្ញាចិត្តកាត់បន្ថយគ្រោះថ្នាក់ដល់ជនស៊ីវិល។ ក្រុមហាម៉ាស បាន​បដិសេធ​ការ​ចោទប្រកាន់ របស់អ៊ីស្រាអែល ដែលថា ខ្លួន ធ្វើប្រតិបត្តិការ​នៅ​ក្នុង​តំបន់​ដែល​មាន​ប្រជាជន​រស់​នៅច្រើន ឬប្រើប្រាស់ជនស៊ីវិលជាខែលមនុស្សការពារពួកគេ។  

អឌ្ឍចន្ទ​ក្រហ​ម​ប៉ាឡេស្ទីន​បាន​ផ្សព្វ​ផ្សាយ​វីដេអូ​នៃ​អ្នក​របួស​ត្រូវ​បាន​គេ​បញ្ជូន​ទៅ​កាន់​មន្ទីរ​ពេទ្យ​។ ទីភ្នាក់​ផ្ដល់​ជំនួយនេះ បាននិយាយថា យន្តហោះ​ចម្បាំង​អ៊ីស្រាអែល​កំពុង​ទម្លាក់​គ្រាប់​បែក​លើ​ផ្លូវ​សំខាន់ៗ​រវាង​តំបន់ហ្កាហ្សាភាគកណ្តាល ដោយរារាំង ដល់ការឆ្លងកាត់​រថយន្ត​គិលាន​សង្គ្រោះ​ និង​រថយន្ត​សង្គ្រោះបន្ទាន់។ក្រុមគ្រូពេទ្យបាននិយាយថា ការវាយប្រហារ​តាម​អាកាស​របស់​អ៊ីស្រាអែល​ដាច់ដោយឡែកមួយទៀតនៅ ទីក្រុង Khan Younis ភាគខាងត្បូងហ្កាហ្សា សម្លាប់​ជន​ជាតិ​ប៉ាឡេស្ទីន៨នាក់។

បព្វជិតបានលុបចោលការប្រារព្ធពិធីបុណ្យណូអែលឬគ្រីសម៉ាសនៅក្រុងបេថ្លេហឹម(Bethlehem) ក្នុងតំបន់ West Bank របស់ប៉ាឡេស្ទីន គ្រប់គ្រងដោយអ៊ីស្រាអែល ជាទីដែល​មាន​ទំនៀម​ទម្លាប់ ដែលថាព្រះយេស៊ូ បានប្រសូតក្នុងទឹកដីដ៏ពិសិដ្ឋនេះកាលពី ២០០០ ឆ្នាំមុន៕