រដ្ឋមន្ត្រីក្រសួងទេសចរណ៍ប៉ាឡេស្ទីន លោក ស្រី រ៉ូឡា ម៉ាយ៉ា (Rula Ma'ayah) បាននិយាយកាលពីថ្ងៃអាទិត្យ ២៤ ធ្នូ ថា ពិភពលោកទាំងមូលកំពុងប្រារព្ធពិធីបុណ្យណូអែល ប៉ុន្តែលើកលែងតែទីក្រុងបេថ្លេហឹម(Bethlehem)ដែលពុំបានឱកាសប្រារពនឹងគេ។

លោកស្រី ម៉ា យ៉ា បាននិយាយទៅកាន់សារព័ត៌មាន Reuters នៅមុនពិធីបុណ្យណូអែល ខាងក្រៅព្រះវិហារនៃសម័យដើម ប៊ីហ្សានថាញ (Byzantine) នៃទីក្រុងបេថ្លេហឹម ជាកន្លែងដែល ធ្លាប់ប្រារពបុណ្យណូអែលមុនៗ មានការបង្ហាញពន្លឺ និងដើមឈើ យ៉ាងសប្បាយរីករាយនៅក្នុង ទីលានចតុរង្គម៉ាជឺ (Manger Square)។

ទោះជាយ៉ាងណាក៏ដោយ នៅឆ្នាំនេះ គ្រិស្តបរិស័ទប៉ាឡេស្ទីនបានប្រារព្ធពិធីបុណ្យណូអែលដ៏ក្រៀមក្រំនៅទីក្រុងបេថ្លេហឹមកាលពីថ្ងៃសៅរ៍ ដោយមានការបំភ្លឺទៀន និងការអធិស្ឋានសុំសន្តិភាពនៅតំបន់ហ្កាហ្សា ជំនួសឱ្យការប្រារព្ធពិធីបុណ្យធម្មតានៅកន្លែងដែលពួកគេជឿថាព្រះយេស៊ូគ្រីស្តបានប្រសូត។

លោកស្រី បាននិយាយថា ពិតជាជាអកុសលខ្លាំងណាស់នៅឆ្នាំនេះ យើងកំពុងទទួលបុណ្យណូអែលដោយគ្មានអ្នកទេសចរមកពីជុំវិញពិភពលោក និងដោយគ្មានជនជាតិប៉ាឡេស្ទីនពីតំបន់នានា ចូលរួមទេ ដោយសារសង្រ្គាមនៅតំបន់ហ្កាហ្សា។

ប្រហែល២.០០០ ឆ្នាំក្រោយមក អ្នកធ្វើធម្មយាត្រាជាធម្មតាបាននាំគ្នាទៅកាន់ទីតាំងល្បីឈ្មោះនៃស្ថាបត្យកម្មនោះនៅក្នុងព្រះវិហារនៃដើមកំណើតរបស់ទីក្រុងបេថ្លេហឹម។ ប៉ុន្តែយុទ្ធនាការរបស់អ៊ីស្រាអែលនៅហ្កាហ្សាបានសម្លាប់មនុស្សជាង ២ម៉ឺននាក់ នេះបើយោងតាមអាជ្ញាធរសុខាភិបាលប៉ាឡេស្ទីននៅក្នុងតំបន់ដែលគ្រប់គ្រងដោយក្រុមហាម៉ាស ហើយប្រជាជនប៉ាឡេស្ទីនភាគច្រើននៃទីក្រុងបេថ្លេហឹមនៅតំបន់ West Bank គ្រប់គ្រងដោយអ៊ីស្រាអែល ក៏ស្ថិតក្នុងការកាន់ទុក្ខផងដែរ៕