រាជរដ្ឋាភិបាលកម្ពុជា នឹងប្រារព្ធពិធីអបអរសាទរខួប៥ឆ្នាំ នៃការសម្ពោធដាក់ឲ្យដំណើរការនូវវិមានឈ្នះ ឈ្នះ និងខួប២៥ឆ្នាំការដាក់ចេញនៅគោលនយោបាយឈ្នះ ឈ្នះ(ការបញ្ចប់សង្រ្គាមស៊ីវិលនៅកម្ពុជា) ដោយការប្រារព្ធនេះ នឹងនាំមកនូវព្រឹត្តិការណ៍ធំៗជាច្រើន មានទាំងការតាំងពិព័រណ៍ការប្រគំតន្រ្តី និងការបាញ់កាំជ្រួចជាដើម។
ខួប៥ឆ្នាំនៃការដាក់ឲ្យដំណើរការនូវវិមានឈ្នះ ឈ្នះ និងខួប២៥ឆ្នាំនៃការបញ្ចប់សង្រ្គាមស៊ីវិលនៅ កម្ពុជានេះ នឹងប្រព្រឹត្តទៅនាថ្ងៃទី២៩ ខែធ្នូ ឆ្នាំ២០២៣ ដល់ថ្ងៃទី១ខែមករា ឆ្នាំ២០២៤ នៅក្នុងបរិវេនវិមានឈ្នះ ឈ្នះ ស្ថិតនៅសង្កាត់បាក់ខែង ខណ្ឌជ្រោយចង្វា រាជធានីភ្នំពេញ។
វិមានឈ្នះ-ឈ្នះ ត្រូវបានចាប់ផ្ដើមកសាងឡើងកាលពីថ្ងៃទី២៥ ខែកុម្ភៈ ឆ្នាំ២០១៦ ដែលមានកម្អស់៥៤ម៉ែត្រ ទទឹង៣៦ម៉ែត្រ លើទំហំផ្ទៃដី៨ហិកតា ស្ថិតនៅសង្កាត់បាក់ខែង ខណ្ឌជ្រោយចង្វា រាជធានីភ្នំពេញ ហើយត្រូវបានសម្ពោធដាក់ឲ្យដំណើរការក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីនៃកម្ពុជា កាលពីថ្ងៃទី២៩ ខែធ្នូ ឆ្នាំ២០១៨ រួមជាមួយនឹងការប្រារព្ធពិធី សប្បាយៗយ៉ាងអធិកអធមផងដែរ។
លោកជំទាវឧត្តមសេនីយ៍ឯក ណឹម សុវត្តី សមាជិកក្រុមការងារសាងសង់វិមាន ឈ្នះ ឈ្នះ បានឲ្យដឹងថា បើគិតត្រឹមចុងឆ្នាំ២០២៣នេះ គឺមានរយៈពេលប្រាំឆ្នាំហើយ ដែលវិមានឈ្នះ ឈ្នះបានសម្ពោធដាក់ឲ្យដំណើរការជាផ្លូវការ ខណៈរយៈពេលប្រាំឆ្នាំមកនេះក្រុមការងារសាង សង់វិមានជាប្រវត្តិសាស្រ្តនេះបានបន្តកសាងនូវសមិទ្ធផល និងការឆ្លាក់ចារិកនៅតាមផ្ទាំងសិលាជុំវិញវិមានជាច្រើនទៀតផងដែរ ដោយការឆ្លាក់នេះគឺដើម្បីរំលេចនូវប្រវត្តិសាស្រ្តខ្មែរជាពិសេសគឺប្រវត្តិសាស្រ្តពិតរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងជាមគ្គុទេសឯក បិតាសន្តិភាពរបស់កម្ពុជាតែម្តង។
សម្រាប់ការប្រារព្ធពិធីខួបប្រាំឆ្នាំ នៃការសម្ពោធដាក់ឲ្យដំណើរការនូវវិមានឈ្នះ ឈ្នះនេះ ត្រូវបាន លោកជំទាវឧត្តមសេនីយ៍ឯក បញ្ជាក់ឲ្យដឹងផងដែរថា ព្រឹត្តិការណ៍នេះនឹងប្រព្រឹត្តទៅកាន់តែធំ ក្រោមបរិយាកាសអធិកអធមរួមផ្សំជាមួយនឹងទស្សនីយភាពកំសាន្តនានា ដែលមានការរៀបចំឡើងដោយក្រសួង ការពារជាតិ និងសហភាពសហព័ន្ធយុវជនកម្ពុជា(សសយក) និងគ្រប់ក្រសួង ស្ថាប័នពាក់ព័ន្ធផ្សេងទៀត ដោយមានការបាញ់កាំជ្រូច ការប្រគំតន្រ្តី ដែលមានសុទ្ធតែតារាល្បីៗ ការតាំងពិពពណ៌លក់ផលិតផ្សេងៗទាំងខ្មែរ និងបរទេស រួមទាំងទស្សនីភាព ជាច្រើនទៀតផងដែរ។
ជំទាវឧត្តមសេនីយ៍ឯក ណឹម សុវត្តី ក៏បានលើកឡើងផងដែរថា ក្នុងរយៈពេលប្រាំឆ្នាំមកនេះមានអ្នកចូលទស្សនា ជាពិសេសសិក្សានុសិស្សមកពីសាលានានានៅទូទាំងប្រទេសមកសិក្សាឈ្វេងយល់, ប្រជាពលរដ្ឋទាំងចាស់ទាំងក្មេង,ព្រះសង្ឃ,រួមទាំងប្រតិភូបរទេស និងភ្ញៀវទេសចរបរទេសផងដែរ នោះប្រមាណប្រាំលាននាក់ ដោយក្នុងនោះភាគច្រើនពួកគេមិនត្រឹមតែចង់ឃើញនូវទិដ្ឋភាពបរិវេនសំណង់ប៉ុណ្ណោះទេ គឺថែមទាំងចង់ដឹង ចង់ឮឲ្យកាន់តែជាក់ច្បាស់នូវអត្ថន័យ នៃការសាងសង់នូវមាននេះផងដែរ។
សូមបញ្ជាក់ផងដែរថា ការប្រារព្ធពិធីអបអរសាទរខួប៥ឆ្នាំ នៃការសម្ពោធដាក់ឲ្យដំណើរការនូវវិមានឈ្នះ ឈ្នះ និងខួប២៥ឆ្នាំការដាក់ចេញនៅគោលនយោបាយឈ្នះ ឈ្នះ(ការបញ្ចប់សង្រ្គាមស៊ីវិលនៅកម្ពុជា) នឹងប្រព្រឹត្តទៅក្រោមអធិបតីភាព សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវ,ថ្នាក់ដឹកនាំកំពូលៗរបស់កម្ពុជា,គ្រប់ថ្នាក់ដឹកនាំតាមក្រសួង ស្ថាប័ននានា និងកងកម្លាំងប្រដាប់អាវុធគ្រប់ប្រភេទផងដែរ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
