ចៅក្រមស៊ើបសួរសាលាដំបូងរាជធានីភ្នំពេញ លោកហុង ម៉ារីណិច បានចេញ​ដីការ​សម្រេច​ឃុំ​ខ្លួន​ជន​បើក​រថយន្ត Jeep បង្កគ្រោះថ្នាក់ចរាចរណ៍ដែលបណ្តាលឱ្យស្លាប់មនុស្សនៅខណ្ឌទួលគោក ដាក់​ពន្ធនាគារ PJ ជាបណ្តោះអាសន្ន ដើម្បីបន្តបើកការស៉ើបអង្គេតតាមនីតិវិធីច្បាប់ ។

ជនជាប់ចោទមានឈ្មោះ ព្រហ្ម វិចិត្រសុសក្តា ភេទប្រុស អាយុ២៣ឆ្នាំ ស្នាក់នៅផ្ទះលេខ៥២ ផ្លូវ​៦៣ សង្កាត់ទន្លេបាសាក់ ខណ្ឌចំការមន បច្ចុប្បន្នគឺជាសិស្សកំពុងបន្តការសិក្សាថ្នាក់អនុបណ្ឌិត ។

ជនរូបនេះត្រូវបានតុលាការចោទប្រកាន់ពីបទ « បើកបរដោយធ្វេសប្រហែស ខ្ជីខ្ជា មិន​ប្រុង​ប្រយ័ត្ន ឬមិនគោរពកាតព្វកិច្ច ដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្តាល​ឱ្យ​ស្លាប់​អ្នក​ដទៃ​ និងបទរត់គេចខ្លួន » តាមមាត្រា ៨៥ នៃច្បាប់ស្ដីពីចរាចរណ៍ផ្លូវគោក និងមាត្រា ៥៤៣ នៃ​ក្រម​ព្រហ្ម​ទណ្ឌ ។

គួររំលឹកថា ករណីគ្រោះថ្នាក់ចរាចរណ៍ខាងលើ គឺបានកើតឡើងកាលពីវេលាយប់ថ្ងៃទី១៥ ខែ ធ្នូ ឆ្នាំ​២០២៣ ស្ថិតនៅចំណុចផ្លូវលេខ៣១៧ ប្រសព្វផ្លូវលេខ៥៦៦ ក្នុងសង្កាត់បឹងកក់ទី២ ខណ្ឌ​ទួលគោក ។

ប្រភពព័ត៌មានបានឱ្យដឹងថា មុនពេលកើតហេតុ គេបានឃើញជនរងគ្រោះ ជិះម៉ូតូឃ្លីក ពណ៌ស ពាក​ផ្លាក​លេខ ភ្នំពេញ1DF-5396 ធ្វើដំណើរតាមបណ្តោយផ្លូវលេខ៥៦៦ ក្នុង​ទិស​ដៅ​ពី​លិច​ទៅ​កើ​ត ចំណែករថយន្តម៉ាក Jeep Gladiator ពណ៌ខ្មៅ ពាក់ផ្លាកលេខ ភ្នំពេញ 2CB-9963 បាន​បើក​បរ​តាមបណ្តោយផ្លូវលេខ៣១៧ ទិសដៅពីជើងទៅត្បូង។

លុះមកដល់ចំណុចកើតហេតុ ភាគីខាងម៉ូតូបានបើកឆ្លងផ្លូវបំបែក ស្រប​ពេល​នោះ​រថយន្ត​បើក​ដល់​ចំណុច​ផ្លូវប្រសព្វ ក៏ជ្រុលទៅបុកម៉ូតូពេញទំហឹង បណ្តាលឱ្យអ្នកបើកម៉ូតូ ខ្ទាត​ចេញ​ពី​ម៉ូតូ​បែក​ក្បាល​ស្លាប់ ចំណែករថយន្ត​នៅ​មាន​ល្បឿន​បាន​អូស​ម៉ូតូ​របស់​ជន​រង​គ្រោះជា​ប់ខា​ងក្រោ​ម​រថយន្ត​ ទើបអ្នកបើកទុករថយន្តចោល ហើយគេចខ្លួនបាត់។ ក្រោយ​ការ​រត់​គេច​ខ្លួន​អស់​មួយ​រយៈពេល​តាំ​ងពីថ្ងៃកើតហេតុរួចមក ជនបង្កខាងលើ ក៏ត្រូវបានអាណាព្យាបាល​នាំ​ខ្លួន​ចូល​ទៅ​កាន់​ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី២៣ ធ្នូ ឆ្នាំ២០២៣ ដើម្បី​ប្រគល់​ខ្លួន​ជូន​នគរបាលអនុវត្តតាមផ្លូវច្បាប់៕ អត្ថបទ ៖ លីហេង