កងកម្លាំងអ៊ីស្រាអែលនិយាយថា ពួកគេកំពុងពង្រីកប្រតិបត្តិការយោធារបស់ខ្លួន នៅតំបន់ហ្កាហ្សាភាគខាងត្បូង ដោយអ្នកនាំពាក្យយោធាអ៊ីស្រាអែល លោក Daniel Hagari បាននិយាយកាលពីថ្ងៃអាទិត្យ (ទី២៤ ខែធ្នូ) ថា កងទ័ពរបស់ខ្លួនកំពុងរកឃើញផ្លូវរូងក្រោមដី និងសម្លាប់អ្នកប្រយុទ្ធរបស់ក្រុមហាម៉ាស នៅទីក្រុង Khan Younis។

លោក Hagari បានប្រាប់ថា ទាហានរបស់លោកនឹងបន្តបង្កើនប្រតិបត្តិការ នៅប៉ុន្មានថ្ងៃខាងមុខ ហើយជាមួយគ្នានេះ លោកក៏បានប្រកាសពីការស្លាប់របស់ទាហានអ៊ីស្រាអែល ១០នាក់ផងដែរ។

កាលពីថ្ងៃអាទិត្យនោះផងដែរ អាជ្ញាធរសុខាភិបាលក្នុងតំបន់ហ្កាហ្សា បានប្រាប់ថា ការវាយប្រហារតាមអាកាសរបស់អ៊ីស្រាអែល បានសម្លាប់មនុស្សយ៉ាងហោចណាស់ ៧០នាក់ នៅឯជំរុំជនភៀសខ្លួន Maghazi នៅកណ្តាលតំបន់ហ្កាហ្សា។

វីដេអូមួយដែលត្រូវបានបង្ហោះនៅលើប្រព័ន្ធផ្សព្វផ្សាយសង្គមដោយសមាគមអឌ្ឍចន្ទក្រហមប៉ាឡេស្ទីនបង្ហាញពីប្រតិបត្តិការជួយសង្គ្រោះ ដោយក្រុមរបស់ខ្លួន ហើយគេជឿថា មនុស្សមួយចំនួនជាប់នៅក្រោមកម្ទេចកម្ទី។ ទីភ្នាក់ងារសារព័ត៌មាន Reuters ឲ្យដឹងថា ជនរងគ្រោះជាច្រើននាក់ជាស្ត្រី និងកុមារ។

អាជ្ញាធរសុខាភិបាល បានបរិហារការវាយប្រហារនេះ ដោយហៅវាថា ជាការសម្លាប់រង្គាល ដែលបានប្រព្រឹត្តនៅក្នុងតំបន់លំនៅឋាន ដែលមានមនុស្សច្រើន។

យោធាអ៊ីស្រាអែលបានប្រាប់សារព័ត៌មាន CNN ថា ខ្លួនកំពុងពិនិត្យមើលរបាយការណ៍នៃឧប្បត្តិហេតុ នៅជំរំនេះ។ យោធាបាននិយាយថា ខ្លួនបាន «ប្តេជ្ញាចិត្តគោរពច្បាប់អន្តរជាតិ ក្នុងនោះរួមទាំងការចាត់វិធានការដែលអាចធ្វើទៅបាន ដើម្បីកាត់បន្ថយគ្រោះថ្នាក់ដល់ជនស៊ីវិល»៕