បេសកជនពិសេសរបស់អង្គការសហប្រជាជាតិប្រចាំប្រទេសយេម៉ែន បាននិយាយកាលពីថ្ងៃសៅរ៍ថា រដ្ឋាភិបាលយេម៉ែនដែលគាំទ្រដោយអារ៉ាប៊ីសាអ៊ូឌីត និងក្រុមឧទ្ទាមហួទី ដែលមានសម្ព័ន្ធភាពជាមួយអ៊ីរ៉ង់បានប្តេជ្ញាចិត្តបោះជំហានឈានទៅរកបទឈប់បាញ់។

ក្រុមហួទីដែលគ្រប់គ្រងភាគខាងជើងនៃប្រទេសយេម៉ែន បានប្រយុទ្ធប្រឆាំងនឹងសម្ព័ន្ធមិត្តយោធាដឹកនាំដោយអារ៉ាប៊ីសាអ៊ូឌីត ចាប់តាំងពីឆ្នាំ ២០១៥ នៅក្នុងជម្លោះដែលបានសម្លាប់មនុស្សរាប់សែននាក់ និងបានបន្សល់ទុក ៨០ភាគរយនៃចំនួនប្រជាជនយេម៉ែន ពឹងផ្អែកលើជំនួយមនុស្សធម៌។

នៅក្នុងសេចក្តីថ្លែងការណ៍មួយដែលចេញដោយការិយាល័យរបស់ខ្លួន បេសកជនពិសេសរបស់UN លោក Hans Grundberg បាននិយាយថា លោក ស្វាគមន៍ការប្តេជ្ញាចិត្តរបស់ភាគីចំពោះសំណុំនៃវិធានការ ដើម្បីអនុវត្តបទឈប់បាញ់ទូទាំងប្រទេស កែលម្អស្ថានភាពរស់នៅ នៅក្នុងប្រទេសយេម៉ែន និងចូលរួមក្នុងការត្រៀមរៀបចំសម្រាប់ការបន្តឡើងវិញនូវដំណើរការនយោបាយរួមមួយ ក្រោមជំនួយរបស់អង្គការសហប្រជាជាតិ»។

សេចក្តីថ្លែងការណ៍នោះ បានឲ្យដឹងថា លោក Grundberg នឹងចូលរួមជាមួយភាគីទាំងអស់ ដើម្បីបង្កើតផែនទីបង្ហាញផ្លូវ ក្រោមការឧបត្ថម្ភរបស់អង្គការសហប្រជាជាតិ ដែលរួមបញ្ចូលទាំងការប្តេជ្ញាចិត្តទាំងនេះ និងគាំទ្រការអនុវត្តរបស់ពួកគេ»។

សេចក្តីថ្លែងការណ៍ បាននិយាយទៀតថា ផែនទីបង្ហាញផ្លូវ រួមជាមួយនឹងបទឈប់បាញ់ ក៏នឹងរួមបញ្ចូលការប្តេជ្ញាចិត្តរបស់ភាគីទាំងពីរ ក្នុងការបន្តការនាំចេញប្រេង បើកប្រាក់បៀវត្សរ៍ពីវិស័យសាធារណៈទាំងអស់ ផ្លូវបើកផ្លូវនានានៅក្នុងទីក្រុង Taiz និងផ្នែកផ្សេងទៀតនៃប្រទេសយេម៉ែន និង «បន្ធូរបន្ថយការរឹតបន្តឹងបន្ថែមទៀត លើអាកាសយានដ្ឋាន Sanaa និងកំពង់ផែ Hudaydah។