អ្នកនាំពាក្យក្រសួងការបរទេសចិន និយាយនៅថ្ងៃចន្ទនេះថា ទីក្រុងប៉េកាំងនឹងមិនចុះខ្សោយក្នុងការតាំងចិត្តការពារអធិបតេយ្យភាពទឹកដី ហើយនិងសិទ្ធិ និងផលប្រយោជន៍សមុទ្ររបស់ខ្លួននោះឡើយ ។ 

ទោះបីជាយ៉ាងណាក៏ដោយ អ្នកស្រី Mao Ning ដែលជាអ្នកនាំពាក្យក្រសួងការបរទេសចិន និយាយថា ចិនត្រៀមខ្លួនរួចរាល់ក្នុងការធ្វើការជាមួយហ្វីលីពីន ដើម្បីដោះស្រាយបញ្ហាសមុទ្រឲ្យបានសមរម្យ តាមរយៈតុចរចា និងការពិគ្រោះយោបល់ ។ 

អនុសាសន៍បែបនេះ បានកើតមានឡើង បន្ទាប់ពីបទអត្ថាធិប្បាយដោយសារព័ត៌មានរដ្ឋចិននៅថ្ងៃចន្ទនេះ ដែលបាននិយាយថា ហ្វីលីពីនពឹងផ្អែកលើការគាំទ្រពីសហរដ្ឋអាមេរិក ដើម្បីបន្តបង្ករឿងជាមួយចិនឥតឈប់ឈរ ដែលវាគឺជាទង្វើដ៏គ្រោះថ្នាក់បំផុតមួយ ធ្វើឲ្យប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាពក្នុងតំបន់ ។ 

សូមបញ្ជាក់ថា ភាពតានតឹងរវាងទីក្រុងប៉េកាំង និងទីក្រុងម៉ានីល បានឡើងកម្តៅខ្លាំង ក្នុងរយៈពេលប៉ុន្មានខែកន្លងមកនេះ ពេលដែលភាគីទាំង ២ដាក់ការចោទប្រកាន់លើគ្នាទៅវិញទៅមកចំពោះជម្លោះនៅក្នុងសមុទ្រចិនខាងត្បូង រួមទាំងការចោទប្រកាន់ថា ចិនបានបើកបុកនាវាដឹកអគ្គនាយសេនាធិការកងទ័ពហ្វីលីពីននៅក្នុងខែនេះ ៕