រដ្ឋមន្ត្រីជាន់ខ្ពស់មួយរូបរបស់រុស្ស៊ី នៅថ្ងៃចន្ទ (ទី២៥ ខែធ្នូ) នេះ បាននិយាយថា រុស្ស៊ីមានប្រៀប ក្នុងការផលិតអាវុធជាងលោកខាងលិច ហើយមានបំណងបន្តរក្សាអត្រាកំណើនឲ្យខ្ពស់ បន្ទាប់ពីទាំងលោកខាងលិច និងរុស្ស៊ីបង្កើនការផលិតអាវុធ សម្រាប់សង្គ្រាមអ៊ុយក្រែន។

រុស្ស៊ីបានលុកលុយអ៊ុយក្រែន ក្នុងខែកុម្ភៈ ឆ្នាំ២០២២ ដែលបង្កឲ្យមានជម្លោះដ៏ធំបំផុតនៅតំបន់អឺរ៉ុប ចាប់គិតតាំងពីសង្គ្រាមលោកលើកទី២ និងការប្រឈមមុខដាក់គ្នាយ៉ាងខ្លាំងក្លាបំផុត រវាងរុស្ស៊ី និងលោកខាងលិច គិតចាប់តាំងពីសម័យសង្គ្រាមត្រជាក់។

អ៊ុយក្រែន និងក្រុមអ្នកគាំទ្រលោកខាងលិចរបស់ខ្លួន បានបង្កើនការផលិតអាវុធ ក្នុងការប៉ុនប៉ងយកឈ្នះលើកងកម្លាំងរុស្ស៊ី នៅសមរភូមិអ៊ុយក្រែន។ ចំណែករុស្ស៊ីក៏បានបន្ថែមល្បឿនផលិតកម្មដូចគ្នាដែរ ប៉ុន្តែនិយាយថា លោកខាងលិចត្រូវស្តីបន្ទោស សម្រាប់សង្គ្រាម ដែលទីក្រុងមូស្គូចាប់ផ្ដើមនៅឆ្នាំ២០១៤។

ឧបនាយករដ្ឋមន្ត្រីលោក Denis Manturov ដែលគ្រប់គ្រងការផលិតអាវុធ បានប្រាប់ទីភ្នាក់ងារសារព័ត៌មាន RIA ថា៖ «ខ្ញុំមិនចង់និយាយអួតនោះទេ ប៉ុន្តែខ្ញុំអាចនិយាយបានថា យើងចាប់ផ្តើមទទួលបាន និងបង្កើនល្បឿនផលិតកម្មលឿនជាងប្រទេសលោកខាងលិច»។ លោក Manturov បាននិយាយថា «សំណួរមួយទៀត គឺថា តើការប្រណាំងនេះ នឹងមានរយៈពេលយូរប៉ុនណា» ដោយបន្ថែមថា ផែនការអាវុធ ២០២៥-២០៣៤ នឹងត្រូវអនុម័តនៅឆ្នាំក្រោយ។

ប្រធានាធិបតី លោក វ្ល៉ាឌីមៀរ ពូទីន និងរដ្ឋមន្ត្រីការពារជាតិរបស់លោក គឺលោក Sergei Shoigu បាននិយាយថា ការផលិតកាំភ្លើងធំ យានដ្រូន រថក្រោះ និងរថពាសដែក កំពុងកើនឡើង។

លោក Manturov បាននិយាយថា បរិមាណនៃការបញ្ជាទិញយុទ្ធោបករណ៍ការពារជាតិរបស់រដ្ឋ ក្នុងឆ្នាំ២០២៣ បានកើនឡើងទ្វេដង ធៀបនឹងឆ្នាំមុន ដោយការផលិត «អាវុធជាក់លាក់» កើនឡើងដប់ដង៕