គណបក្សដែលកំពុងតែរីកចម្រើនជាលំដាប់របស់ប្រទេសថៃ គឺគណបក្សបោះជំហានទៅមុខ (Move Forward) ដែលបានឈ្នះការបោះឆ្នោតនៅឆ្នាំនេះ ប៉ុន្តែត្រូវបានរារាំងមិនឲ្យចូលក្នុងរដ្ឋាភិបាល នៅថ្ងៃចន្ទ (ទី២៥ ខែធ្នូ) នេះ បាននិយាយថា ខ្លួនមានទំនុកចិត្តក្នុងសំណុំរឿងតុលាការ ដែលកំពុងត្រូវបានស៊ើបអង្កេត ជុំវិញការសន្យា អំឡុងយុទ្ធនាការ ដែលស្នើឲ្យមានកំណែទម្រង់ច្បាប់ប្រមាថព្រះមហាក្សត្រ។

គណបក្សបោះជំហានទៅមុខ បានឈ្នះអាសនៈភាគច្រើននៅក្នុងការបោះឆ្នោត កាលពីខែឧសភា ប៉ុន្តែលោក Pita Limjaroenrat ដែលពេលនោះជាមេដឹកនាំគណបក្ស ត្រូវបានរារាំងមិនឲ្យក្លាយជានាយករដ្ឋមន្ត្រី ដោយឥទ្ធិពលរបស់ពួកអភិរក្ស នៅក្នុងសភាជាន់ខ្ពស់។

ការប្តេជ្ញារបស់គណបក្ស ក្នុងការធ្វើកំណែទម្រង់ច្បាប់ស្តីពីការប្រមាថព្រះមហាក្សត្រដ៏តឹងរ៉ឹងរបស់ប្រទេសថៃ បានធ្វើឲ្យមានការរំជើបរំជួលដល់សមាជិកព្រឹទ្ធសភា ដែលគាំទ្រពួកយោធា ដែលភាគច្រើនជារាជានិយម ដោយសមាជិកជាច្រើន ត្រូវបានតែងតាំងដោយរបបយោធាចុងក្រោយ។

តុលាការធម្មនុញ្ញកំពុងពិចារណាលើញត្តិ ដែលលើកហេតុផលថា ការសន្យារបស់គណបក្សបោះជំហានទៅមុខ ដើម្បីឲ្យមានការកែទម្រង់ច្បាប់ប្រមាថព្រះមហាក្សត្រ ដែលស្មើនឹងការប៉ុនប៉ងផ្តួលរំលំរបបរាជានិយមអាស្រ័យរដ្ឋធម្មនុញ្ញ។

អតីតមេដឹកនាំគណបក្សបោះជំហានទៅមុខ លោក Pita ដែលបានដឹកនាំគណបក្ស នៅក្នុងការបោះឆ្នោត ប៉ុន្តែបានលាលែងពីតំណែង បានផ្តល់ភស្តុតាងនៅក្នុងសវនាការ នាថ្ងៃចន្ទនេះ ហើយបាននិយាយថា អ្វីៗ «ដំណើរការទៅយ៉ាងល្អ»។ តុលាការបានឲ្យដឹងថា ខ្លួននឹងប្រកាសសាលក្រម ក្នុងសំណុំរឿងនេះ នៅថ្ងៃទី៣១ ខែមករា៕