មេនគរបាលស៊ែប៊ី នៅថ្ងៃចន្ទ (ទី២៥ ខែធ្នូ) បាននិយាយថា នគរបាល ៨ នាក់ បានរងរបួស ហើយមនុស្ស ៣៨នាក់ ត្រូវបានឃុំខ្លួន បន្ទាប់ពីមានការតវ៉ារបស់គណបក្សប្រឆាំង ជុំវិញលទ្ធផលបោះឆ្នោត។

ប្រធាននាយកដ្ឋាននគរបាល នៅក្រសួងមហាផ្ទៃស៊ែប៊ី លោក Ivica Ivkovic បាននិយាយទៅកាន់ប្រព័ន្ធផ្សព្វផ្សាយ បន្ទាប់ពីមនុស្សរាប់ពាន់នាក់ បានប្រមូលផ្តុំគ្នានៅក្នុងរដ្ឋធានីរបស់ប្រទេសស៊ែប៊ី កាលពីថ្ងៃអាទិត្យ (ទី២៤ ខែធ្នូ) ក្នុងការតវ៉ាប្រឆាំងរដ្ឋាភិបាល ដែលបានប្រែក្លាយទៅជាការប៉ះទង្គិចជាមួយនគរបាលកុបកម្ម។

លោក Ivkovic បាននិយាយថា មន្ត្រីនគរបាល ដែលយាមសាលាក្រុងបានរងការវាយប្រហារអស់រយៈពេល ៣ម៉ោង ប៉ុន្តែបានអត់ធ្មត់មិនធ្វើអន្តរាគមន៍ ហើយរំពឹងថា អំពើហិង្សានឹងមិនកើនឡើងនោះទេ។ បាតុករបានវាយបំបែកបង្អួច និងកញ្ចក់ នៅច្រកចូលធំរបស់សាលាក្រុង មុនពេលនគរបាលប្រើហ្គាសបង្ហូរទឹកភ្នែក ដើម្បីបំបែកពួកគេ នៅម៉ោងប្រហែល ១០យប់ (ត្រូវនឹងម៉ោង ២១ ម៉ោងសកល)។

ក្រុមប្រឆាំងដែលដឹកនាំដោយសម្ព័ន្ធភាពកណ្តាលឆ្វេង គឺគណបក្សស៊ែប៊ីប្រឆាំងនឹងអំពើហិង្សា (Serbia Against Violence) បាននិយាយថា ការតវ៉ានឹងបន្តនៅថ្ងៃចន្ទនេះ ដោយនិស្សិតគ្រោងនឹងបិទចរាចរណ៍ នៅក្នុងរដ្ឋធានីរបស់ប្រទេសស៊ែប៊ី។

យោងតាមលទ្ធផលបឋមរបស់គណៈកម្មាធិការរៀបចំការបោះឆ្នោតរដ្ឋ បានបង្ហាញថា គណបក្សជឿនលឿនស៊ែប៊ី (SNS) ដែលកំពុងកាន់អំណាច បានឈ្នះជាមួយនឹងសំឡេងឆ្នោត ៤៦,៧២ភាគរយ ក្នុងការបោះឆ្នោតសភាកាលពីចុងសប្តាហ៍មុន។ គណបក្សស៊ែប៊ីប្រឆាំងនឹងអំពើហឹង្សា បានជាប់លំដាប់ទី២ ដោយមានសំឡឹងឆ្នោត ២៣,៥៦ភាគរយ ហើយគណបក្សសង្គមនិយមស៊ែប៊ី ទទួលបាន ៦,៥៦ភាគរយ៕