អ៊ីរ៉ង់ នៅថ្ងៃចន្ទ (ទី២៥ ខែធ្នូ) នេះ បាននិយាយថា ខ្លួននឹងបន្តកិច្ចប្រឹងប្រែង ដើម្បីឲ្យទទួលបានការដោះលែង ចំពោះអតីតមន្ត្រីអ៊ីរ៉ង់ ដែលត្រូវបានកាត់ទោសនៅក្នុងប្រទេសស៊ុយអែតឲ្យជាប់ពន្ធនាគារអស់មួយជីវិត ពីបទការមានចំណែកក្នុងការប្រហារជីវិតលើអ្នកទោសនយោបាយ នៅអ៊ីរ៉ង់។

ដោយមិនបានបញ្ជាក់លម្អិតច្បាស់លាស់ អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បាននិយាយថា៖ «សេចក្តីសម្រេចដ៏អយុត្តិធម៌ និងហួសហេតុនេះ មិនបញ្ចប់កិច្ចប្រឹងប្រែងការទូតរបស់អ៊ីរ៉ង់ ក្នុងការធ្វើមាតុភូមិនិវត្តន៍ និងដោះលែងពលរដ្ឋអ៊ីរ៉ង់រូបនេះនោះទេ ហើយយើងនឹងប្រើប្រាស់គ្រប់មធ្យោបាយស្របច្បាប់ និងដែលអាចប្រើបាន»។

សូមបញ្ជាក់ថា កាលពីថ្ងៃអង្គារសប្ដាហ៍កន្លងទៅ តុលាការឧទ្ធរណ៍ស៊ុយអែត បានតម្កល់សាលក្រម ដែលសម្រេចថា មានទោស និងកាត់ទោសឲ្យជាប់ពន្ធនាគារអស់មួយជីវិតពីបទឃាតកម្ម និងឧក្រិដ្ឋកម្មធ្ងន់ធ្ងរប្រឆាំងនឹងច្បាប់អន្តរជាតិ សម្រាប់អតីតមន្ត្រីឈ្មោះ Hamid Noury។

កាលពីដើមខែធ្នូ អ៊ីរ៉ង់បានចាប់ផ្តើមការកាត់ក្តីលើជនជាតិស៊ុយអែត ឈ្មោះ Johan Floderus ជាបុគ្គលិករបស់សហភាពអឺរ៉ុប ដែលត្រូវបានចោទប្រកាន់ពីបទចារកម្មឲ្យអ៊ីស្រាអែល និងប្រព្រឹត្ត «អំពើពុករលួយនៅលើផែនដី» ជាឧក្រិដ្ឋកម្ម ដែលត្រូវអនុវត្តទោសប្រហារជីវិត៕