កំពង់ឆ្នាំង៖ នៅព្រឹកថ្ងៃទី២៦ ខែធ្នូ ឆ្នាំ២០២៣នេះ អាជ្ញាធរ​ក្រុងបានចុះរៀបចំ​សណ្តាប់​ធ្នាប់​លើ​ដី​ទី​ទួល​សុវត្ថិភាព មុខផ្សារឆ្នាំងដែលអាជីវករបានយករបស់របរទៅទុកចោល និង​សំរាម​ដែល​ពួកគាត់​បាន​បោះ​ចោល​នៅ​ទីនោះ។ ទន្ទឹមនឹងនោះ លោក ទូច លីហួត អភិបាលរងក្រុងកំពង់ឆ្នាំង ដែលបាន​ដឹក​នាំ​ក្រុម​ការងារ​នៅ​ព្រឹក​នេះ ក៏បានអោយអាជីវករទាំងនោះ ធ្វើកិច្ចសន្យាបញ្ឈប់​រាល់​សកម្មភាព​ដាក់​តាំង​លក់​សម្ភារៈ​នានា​នៅតាមខឿនការ៉ូឡា និងតាមផ្លូវចាប់ពីចំណុចខាងជើងវត្តយាយទេព រហូតដល់ ចំណុច​ចុង​កោះ សង្កាត់ផ្សារឆ្នាំង ក្រុងកំពង់ឆ្នាំង ដោយត្រូវចូលរួមសហការជាមួយអាជ្ញាធរមានសមត្ថកិច្ច ក្នុង​ការ​រៀបចំ​សណ្តាប់ធ្នាប់តាមដងផ្លូវទាំងនេះអោយបានល្អស្អាត មុនរដ្ឋបាលក្រុង​កំពង់ឆ្នាំង​ចាត់​វិធានការ​រដ្ឋបាល ព្រោះផ្លូវនេះ ជាផ្លូវទេសចរជាតិអន្តរជាតិឡើងចុះ រៀងរាល់ថ្ងៃ ។

លោក ទូច លីហួត បានបន្តថា៖ យោងតាមការណែនាំរបស់ឯកឧត្តម ស៊ុន សុវណ្ណារិទ្ធិ អភិបាល​ខេត្ត​កំពង់ឆ្នាំង និងលោក ហ៊ីង ភ័ព្វមីនា អភិបាលក្រុងកំពង់ឆ្នាំង បានអោយលោក និងក្រុមការងារ ចុះ​រៀប​ចំ​សណ្តាប់​ធ្នាប់​នៅចំណុចចាប់ពីខាងជើងវត្តយាយទេព ដល់ចំណុចចុងកោះ សង្កាត់ផ្សារឆ្នាំង ក្រុង​កំពង់ឆ្នាំង​។ អាជីវករដែលមានតូបលក់ដូរនៅតាមបណ្តោយផ្លូវនេះ បានយកខឿនការ៉ូឡា និងផ្លូវថ្នល់ មក​តាំង​លក់​នូវរបស់របរដូចជាលក់ឈើបង្គោល លក់ត្រីសាច់ លក់ខោអាវ ម៉ាស៊ីន ធុងស្នោ ថ្នាំនិងចំណីសត្វ និង​ចាប់ហួយនានា រួមទាំងបានដាក់របស់របរចោលតាមផ្លូវលើដីទីទួលសុវត្ថិភាព មិនមានសណ្តាប់ធ្នាប់ សោភ័ណភាព និងអនាម័យឡើយ។ ចំណែកសំរាមវិញ បានហោះហើរពេញផ្លូវ លើដីទីទួលសុវត្ថិភាព និង​មាន​ក្លិនស្អុយមកលើអ្នកធ្វើដំណើរទៀតផង។ ករណីទាំងនេះ លោកអភិបាល​រង​ក្រុង​បាន​សំណូមពរ​ដល់​អាជីវករ​ទាំង​អស់ ត្រូវចូលរួមទាំងអស់គ្នាក្នុងការរៀបចំសណ្តាប់ធ្នាប់ អនាម័យ សោភ័ណភាព តាមដង​ផ្លូវ​នេះ​ជា​បន្ទាន់ មុនរដ្ឋបាលក្រុងកំពង់ឆ្នាំង ចាត់វិធានការរដ្ឋបាលលើទីតាំងទាំងអស់នោះ។

អាជីវករទាំងនោះ បានចូលរួមធ្វើកិច្ចសន្យាជាមួយរដ្ឋបាលក្រុង និងនគរបាលសណ្តាប់ធ្នាប់ ដោយ​ត្រូវ​បញ្ឈប់​ការ​លក់ដូរលានលយយកចិញ្ចើមផ្លូវដាក់តាំងលក់សម្ភារៈ និងត្រូវរុះរើរបស់​របរ​អោយ​បាន​ស្អាត​ពី​លើ​ដីទីទួលសុវត្ថិភាព មុនរដ្ឋបាលក្រុងកំពង់ឆ្នាំង ចាត់វិធានការរដ្ឋបាលនៅពេលខាងមុខ៕ កាំង ហុងវាស្នា