ប្រព័ន្ធផ្សព្វផ្សាយក្នុងស្រុកបានរាយការណ៍ថា លំនៅឋានជាង ១០០.០០០ខ្នង គ្មានអគ្គិសនីប្រើប្រាស់ កាលពីល្ងាចថ្ងៃច័ន្ទ ក្នុងរដ្ឋ Queensland ភាគខាងកើតប្រទេសអូស្ត្រាលី បន្ទាប់ពីព្យុះដ៏មានឥទ្ធិពល បានវាយបោកបក់លើតំបន់នេះ។

សារព័ត៌មានឱ្យដឹងថា រដ្ឋ Queensland ភាគអាគ្នេយ៍ ត្រូវបានវាយបោកបក់ដោយព្យុះដ៏មានឥទ្ធិពល ជាច្រើន ដោយតំបន់ Gold Coast, Scenic Rim និងតំបន់ Logan បានទប់ទល់នឹងព្យុះដ៏ខ្លាំងនេះ។ របាយការណ៍បាននិយាយថា អង្គភាពសេវាសង្គ្រោះបន្ទាន់ នៅតែមានភាពមមាញឹក ដោយមានដើមឈើនិងបង្គោលខ្សែភ្លើងបាក់រលំជាច្រើន ហើយលំនៅឋានជាង ១០០.០០០ខ្នង គ្មានអគ្គិសនីប្រើសប្រាស់។ អង្គភាពសេវាសង្គ្រោះបន្ទាន់រដ្ឋ (SES) បានទទួលការហៅទូរស័ព្ទច្រើនជាង ១២០លើក ដែលភាគច្រើនទាក់ទងនឹងដើមឈើបាក់រលំលើលំនៅឋាន។

មុនពេលមានខ្យល់ព្យុះ តំបន់ភាគអាគ្នេយ៍នៃរដ្ឋនេះ បានរីករាយជាមួយថ្ងៃបុណ្យណូអែល និងកម្តៅថ្ងៃ។ មានការព្រួយបារម្ភថា អាកាសធាតុមិនអំណោយផលខ្លាំង កាលពីថ្ងៃអាទិត្យ និងការដាច់អគ្គិសនី កើតឡើងម្តងទៀតនៅថ្ងៃច័ន្ទ ដែលបំផ្លាញការប្រារព្ធពិធីបុណ្យណូអែល ប៉ុន្តែព្យុះនោះបានរសាយ។ ប្រព័ន្ធផ្សព្វផ្សាយ ABC News របស់ប្រទេសអូស្ត្រាលី បានរាយការណ៍ថា ព្យុះផ្គររន្ទះដ៏ខ្លាំង ទំនងជាវាយបោកបក់នៅភាគខាងកើតប្រទេសអូស្ត្រាលី ក្នុងអំឡុងពេលបុណ្យណូអែលឆ្នាំនេះ ដោយសារគំរូអាកាសធាតុខុសពីធម្មតា។

របាយការណ៍បាននិយាយថា រយៈពេលព្យុះផ្គររន្ទះ កើតឡើងដោយសារតែខ្យល់ប៉ូល ដែលបក់ផុតពីទ្វីបអង់តាក់ទិក ត្រូវបានគេរំពឹងថានឹងវាយបោកបក់ដោយផ្ទាល់ទៅលើរដ្ឋភាគអាគ្នេយ៍ ចាប់ពីថ្ងៃបុណ្យណូអែល ឬពីថ្ងៃអាទិត្យ ដល់ថ្ងៃអង្គារនេះ។