កងទ័ពជើងទឹកឥណ្ឌា នឹងដាក់ពង្រាយនាវាពិឃាតបំពាក់ដោយមីស៊ីលប្រព័ន្ធទូរបញ្ជានៅសមុទ្រអារ៉ាប់ បន្ទាប់ពីនាវាពាណិជ្ជកម្មដែលមានសម្ព័ន្ធភាពជាមួយអ៊ីស្រាអែល ត្រូវបានវាយប្រហារនៅឆ្នេរសមុទ្រឥណ្ឌា កាលពីចុងសប្តាហ៍ក្នុងកិច្ចខិតខំប្រឹងប្រែងដើម្បី «រក្សាវត្តមានការពារ» នេះបើយោងតាមកងទ័ពជើងទឹកឥណ្ឌាបាននិយាយកាលពីល្ងាចថ្ងៃច័ន្ទ (២៥ ធ្នូ)។

សេចក្តីថ្លែងការណ៍នោះបាននិយាយថា កងទ័ពជើងទឹកឥណ្ឌាកំពុងស៊ើបអង្កេតពីមូលហេតុនៃការវាយប្រហារលើនាវា អ៊ឹមវី ជឹមផ្លូតូ (MV Chem Pluto) ដែលបានចូលចតនៅទីក្រុងបុមបៃ កាលពីថ្ងៃច័ន្ទ ហើយរបាយការណ៍ដំបូងបានចង្អុលបង្ហាញពីការវាយប្រហារដោយយានដ្រូន។

សេចក្តីថ្លែងការណ៍បានបន្ថែមថា «ការធ្វើកោសល្យវិច្ច័យ និងការវិភាគបច្ចេកទេសបន្ថែមទៀតនឹងត្រូវបានធ្វើឡើងដើម្បីបង្កើតបរិមាណនៃការវាយប្រហារ រួមទាំងប្រភេទ និងបរិមាណនៃជាតិផ្ទុះដែលបានប្រើ»។

កងទ័ពជើងទឹកបាននិយាយថា ការស៊ើបអង្កេតរួមគ្នាលើការវាយប្រហារនេះកំពុងត្រូវបានអនុវត្តដោយភ្នាក់ងារផ្សេងៗ បន្ទាប់ពីក្រុមអាវុធជាតិផ្ទុះបានបញ្ចប់ការវិភាគរបស់ខ្លួន៕