មន្ត្រីក្រសួងការពារជាតិរុស្ស៊ី បាននិយាយថាមនុស្សម្នាក់បានស្លាប់ ២នាក់ផ្សេងទៀតរងរបួស និងនាវាធុនធំមួយគ្រឿងកំពុងចត មានឈ្មោះថា Novocherkassk ត្រូវបានបំផ្លាញ ក្នុងការវាយប្រហាររបស់អ៊ុយក្រែន កាលពីពេលយប់ ទៅលើទីក្រុងកំពុងផែ Feodosia តំបន់គ្រីម៉េ។

ទីភា្នក់ងារសារព័ត៌មាន Interfax បានដកស្រង់សម្តីពីក្រសួងការពារជាតិដែលនិយាយថា អ៊ុយក្រែនបានប្រើប្រាស់ មីស៊ីលតម្រង់គោលដៅ បាញ់ចេញពីយន្តហោះដើម្បីវាយប្រហារទីក្រុង Feodosia ។

អភិបាលតំបន់គ្រីម៉េ ដែលលើកបន្តុបដោយរុស្ស៊ី លោក Sergei Aksyonov បាននិយាយនៅលើកម្មវិធីផ្ញើរសារតេឡេក្រាមថា មនុស្សម្នាក់បានស្លាប់ និង២នាក់រងរបួសបណ្តាលមកពីការវាយប្រហារ។

អភិបាលតំបន់គ្រីម៉េ និយាយថា អ៊ុយក្រែន បានអនុវត្តការវាយប្រហារលើទីក្រុង Feodosia តំបន់គ្រីម៉េ បណ្តាលឲ្យមានអគ្គិភ័យ នៅតំបន់កំពង់ផែទីក្រុង។

នៅពេលនេះ កំពង់ផែត្រូវបានបិទ ការផ្ទុះបានបញ្ឈប់ ហើយអគ្គិភ័យក៏ត្រូវបានទប់ស្កាត់។ អង្គភាពសេវាសង្គ្រោះបន្ទាន់ដែលពាក់ព័ន្ធទាំងអស់ បានស្ថិតនៅកន្លែងកើតហេតុ ហើយពលរដ្ឋនៅតាមលំនៅឋានជាច្រើន នឹងត្រូវឲ្យជម្លៀសចេញ។