​

នគរបាលតំបន់ បាននិយាយថា ចំនួនអ្នកស្លាប់ដោយសារអគ្គិភ័យនៅរោងចក្រចម្រាញ់រ៉ែនីកែល របស់ប្រទេសឥណ្ឌូនេស៊ី បានកើនឡើង ដល់១៨ នាក់ គិតត្រឹមថ្ងៃអង្គារទី២៦ខែ ធ្នូនេះ ដោយមានមនុស្សរាប់សិបនាក់ទៀតកំពុងត្រូវបានព្យាបាលនៅក្នុងមន្ទីរពេទ្យ ខណៈប្រតិបត្តិការនៅរោងចក្រចម្រាញ់នេះនៅតែត្រូវបានផ្អាក ហើយអាជ្ញាធរកំពុងស៊ើបអង្កេតពីមូលហេតុនៃឧបទ្ទវហេតុ។

អធិការនគរបាល តំបន់ Morowali លោក Suprianto បានប្រាប់សារព័ត៌មាន AFP ថា ចំនួនជនរងគ្រោះដែលបានស្លាប់បានកើនឡើង៥នាក់បន្ថែមទៀត ដូច្នេះអ្នកស្លាប់សរុបមានចំនួន១៨ នាក់ ។

ឧបទ្ទវហេតុនេះ បានកើតឡើង ខណៈកម្មករបានធ្វើការជួសជុលឡចម្រាញ់នៅរោងចក្រដែលជាកម្មសិទ្ធិរបស់ក្រុមហ៊ុនដែកអ៊ីណុក PT Indonesia Tsingshan Stainless Steel (ITSS) នៅលើកោះ ស៊ុលឡាវ៉េស៊ី(Sulawesi) ជាអង្គភាពរបស់ក្រុមហ៊ុន Tsingshan Holding Group ប្រទេសចិន។

ការស៊ើបអង្កេតដំបូង បានបង្ហាញថា ការផ្ទុះបានកើតឡើងនៅពេលដែលកម្ទេចសំណល់ចេញពីឡ ដែលត្រូវបានបិទសម្រាប់ការជួសជុលថែទាំ បានហូរចេញមកក្រៅ ហើយប៉ះនឹងសម្ភារៈងាយឆេះនៅជុំវិញទីតាំងនោះ។

ក្រុមហ៊ុនដែកអ៊ីណុក ITSS គឺជាអ្នកជួលទីតាំងនៅក្នុងសួនឧស្សាហកម្ម ដែលភាគច្រើនគ្រប់គ្រងដោយ ក្រុមហ៊ុន Tsingshan រួមជាមួយដៃគូក្នុងស្រុក Bintang Delapan ។ កោះស៊ូឡាវ៉េស៊ី(Sulawesi) គឺជាមជ្ឈមណ្ឌលសម្រាប់ការផលិតរ៉ែនីកែល របស់ប្រទេសសម្បូររ៉ែ ដែលលោហៈមូលដ្ឋាន ត្រូវបានប្រើសម្រាប់អាគុយរថយន្តអគ្គិសនី និងដែកអ៊ីណុក។

ប្រទេសឥណ្ឌូនេស៊ី ជាប្រទេសផលិតរ៉ែនីកែលធំបំផុតរបស់ពិភពលោក បានហាមឃាត់ការនាំចេញរ៉ែនីកែល មិនទាន់កែច្នៃ ខណៈមានការជំរុញការវិនិយោគធំៗក្នុងការចម្រាញ់ និងកែច្នៃ ប៉ុន្តែគ្រោះថ្នាក់ ធ្ងន់ធ្ងរជាញឹកញាប់ បានកើតឡើងលើវិស័យនេះ ក្នុងរយៈពេលប៉ុន្មានឆ្នាំថ្មីៗនេះ។