ទីភ្នាក់ងារព័ត៌មានអ៊ុយក្រែន Ukrinform រាយការណ៍កាលពីថ្ងៃទី ២៥ ខែធ្នូថា ទោះបីជាមានការជួបប្រជុំជាមួយ លោក Dariusz Klimczak រដ្ឋមន្ត្រីក្រសួងហេដ្ឋារចនាសម្ព័ន្ធនៃសាធារណរដ្ឋប៉ូឡូញក៏ដោយ ក្រុមហ៊ុនដឹកជញ្ជូនទំនិញប៉ូឡូញ បានកំណត់លើការរក្សាការបិទច្រកព្រំដែនចំនួនបី នៅតាមព្រំដែនប៉ូឡូញ-អ៊ុយក្រែន ដោយប្រកាសបដិសេធរបស់ពួកគេក្នុងការដកចេញការរឹតបន្តឹងពេញមួយរដូវវិស្សមកាល។

លោក Edyta Ozygała អ្នករៀបចំកូដកម្មនៅក្រុមហ៊ុនដឹកជញ្ជូននៅភូមិ Dorohusk បាននិយាយថា ក្រុមហ៊ុនដឹកជញ្ជូនទំនិញ បានរៀបចំបញ្ជីកាតព្វកិច្ចរួចហើយ។

លោក Ozygała បាននិយាយថា៖ «យើងនឹងនៅទីនេះ រហូតដល់យើងឈានដល់ការឯកភាពពិតប្រាកដ» ។

លោក Klimczak បានសង្កត់ធ្ងន់លើភាពចាំបាច់ ក្នុងការត្រួតពិនិត្យកិច្ចព្រមព្រៀងពាណិជ្ជកម្មរវាងអ៊ុយក្រែន និងសហភាពអឺរ៉ុប ដើម្បីដោះស្រាយបញ្ហាព្រំដែន។

លោក Klimczak បានបន្តទៀតថា៖«តាមទស្សនៈរបស់យើង វាច្បាស់ណាស់ថា យើងត្រូវជួសជុល និងកែប្រែកិច្ចព្រមព្រៀងពាណិជ្ជកម្មបច្ចុប្បន្នរវាងសហភាពអឺរ៉ុប និងអ៊ុយក្រែន»។