អ្នកនាំពាក្យយោធារបស់ប្រទេសហ្វីលីពីន នៅថ្ងៃអង្គារ (ទី២៦ ខែធ្នូ) នេះ បាននិយាយថា ហ្វីលីពីនមិនបានបង្កជម្លោះ នៅក្នុងសមុទ្រចិនខាងត្បូងនោះទេ ដោយនេះជាការឆ្លើយតបទៅនឹងការចោទប្រកាន់របស់ប្រទេសចិន ដែលថា ទីក្រុងម៉ានីលកំពុងរំលោភបំពានលើទឹកដីរបស់ទីក្រុងប៉េកាំង។

នេះគឺជាទិដ្ឋភាពចុងក្រោយបង្អស់ ក្នុងភាពតានតឹង ដែលកំពុងតែកើនឡើង ខណៈដែលប្រទេសទាំង២ បានចោទប្រកាន់គ្នាទៅវិញទៅមក ក្នុងប៉ុន្មានខែថ្មីៗនេះ ជុំវិញជម្លោះដែនសមុទ្រជាបន្តបន្ទាប់ ក្នុងនោះរួមទាំងការចោទប្រកាន់លើប្រទេសចិនថា បានបុកនាវា ដែលដឹកមេយោធាហ្វីលីពីន នៅខែនេះផងដែរ។

លោក Medel Aguilar បានប្រាប់ទូរទស្សន៍រដ្ឋ PTV ថា៖ «ប្រទេសហ្វីលីពីនមិនបានបង្កឲ្យមានជម្លោះនោះទេ។ យើងគោរពច្បាប់អន្តរជាតិជានិច្ច ហើយយើងគ្រាន់តែអនុវត្តច្បាប់ប្រទេសរបស់យើងប៉ុណ្ណោះ ពោលគឺមានន័យថា ក្នុងព្រំដែនកំណត់នៃដែនទឹក និងតំបន់សេដ្ឋកិច្ចផ្តាច់មុខរបស់យើង ដែលយើងមានសិទ្ធិអធិបតេយ្យភាព»។

ការអត្ថាធិប្បាយនេះ បានធ្វើឡើងមួយថ្ងៃបន្ទាប់ពីសារព័ត៌មាន People's Daily ដែលជាឧបករណ៍នាំពាក្យរបស់បក្សកុម្មុយនីស្តចិន បានសរសេរថា ហ្វីលីពីនបានពឹងផ្អែកលើការគាំទ្ររបស់សហរដ្ឋអាមេរិក ដើម្បីបន្តបង្កបញ្ហាជាមួយចិន។ សារព័ត៌មាននោះបន្ថែមថា ឥរិយាបទ «ដ៏គ្រោះថ្នាក់បំផុត» នេះ បានធ្វើឲ្យប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាពក្នុងតំបន់។

លោក Aguilar បាននិយាយថា សកម្មភាពរបស់ហ្វីលីពីន នឹងមិនធ្វើឲ្យនាវា និងអ្នកធ្វើដំណើរតាមសមុទ្រនានា មានគ្រោះថ្នាក់នោះទេ ផ្ទុយទៅវិញបានចោទប្រកាន់ចិនពីការបើកនាវាកាច់ចុះកាច់ឡើងប្រកបដោយគ្រោះថ្នាក់ ដែលជួនកាលបណ្តាលឲ្យមានការបុកគ្នា នៅក្នុងសមុទ្រ៕