រដ្ឋមន្ត្រីក្រសួងការពារជាតិរុស្ស៊ីលោក Sergei Shoigu នៅថ្ងៃអង្គារ (ទី២៦ ខែធ្នូ)បាននិយាយថា កងកម្លាំងរុស្ស៊ី បានបញ្ឈប់ការវាយបករបស់អ៊ុយក្រែន ហើយឥឡូវនេះ កំពុងរុលទៅលើគ្រប់សមរភូមិទាំងអស់។

លោក Shoigu បាននិយាយថា៖ «កងទ័ពរុស្ស៊ីកំពុងដណ្ដើមបានទីតាំងអំណោយផលបន្ថែមទៀតបណ្ដើរៗ និងពង្រីកដែនដីគ្រប់គ្រង នៅគ្រប់ទិសដៅ។ យើងកំពុងបន្តឆ្ពោះទៅរកការសម្រេចបាននូវគោលដៅដែលបានប្រកាសពីប្រតិបត្តិការយោធាពិសេស»។

កាលពីថ្ងៃចន្ទ (ទី២៥ ខេធ្នូ) លោក Shoigu បានរាយការណ៍ជូនទៅប្រធានាធិបតីរុស្ស៊ី លោក Vladimir Putin ថា កងកម្លាំងរុស្ស៊ីបានគ្រប់គ្រងទាំងស្រុងលើទីក្រុង Maryinka ដែលជាទីក្រុងមួយនៅភាគខាងកើតអ៊ុយក្រែន។

យ៉ាងណាក្ដី ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់ដោយឯករាជ្យនូវរបាយការណ៍ ឬអ្នកដែលគ្រប់គ្រងទីក្រុង Maryinka ដែលជាទីក្រុងតូចមួយ នៅក្នុងតំបន់ Donetsk ដែលមានប្រជាជន នៅមុនសង្គ្រាមប្រហែល ១០.០០០នាក់ និងដែលចាប់តាំងពីពេលនោះមក ត្រូវបានប្រែក្លាយទៅជាគំនរបាក់បែក៕