អង្គការសហប្រជាជាតិ កាលពីថ្ងៃអង្គារទី ២៦ ខែធ្នូ បានប្រកាសតែងតាំងអ្នកសម្របសម្រួល ដើម្បីពិនិត្យការដឹកជញ្ជូនជំនួយមនុស្សធម៌ទៅកាន់តំបន់ហ្កាហ្សា ជាផ្នែកនៃសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានអនុម័តកាលពីថ្ងៃសុក្រ ដើម្បីជំរុញការផ្តល់ជំនួយមនុស្សធម៌។ អង្គការសហប្រជាជាតិ បាននិយាយនៅក្នុងសេចក្តីថ្លែងការណ៍ថា លោកស្រី ស៊ីហ្គ្រីត កាអាង(Sigrid Kaag) មកពីប្រទេសហូឡង់ នឹងក្លាយជាអ្នកសម្របសម្រួលផ្នែកមនុស្សធម៌ និងការកសាងឡើងវិញ សម្រាប់តំបន់ហ្កាហ្សា ហើយនឹងចាប់ផ្តើមតួនាទីរបស់លោកស្រី នៅថ្ងៃទី ៨ ខែមករា។ អង្គការសហប្រជាជាតិ បាននិយាយថា នៅក្នុងតួនាទីនេះ លោកស្រី នឹងជួយជ្រុំជ្រែង សម្របសម្រួល ពិនិត្យ និងផ្ទៀងផ្ទាត់ការដឹកជញ្ជូនជំនួយមនុស្សធម៌សម្រាប់តំបន់ហ្កាហ្សា។ លោកស្រី ក៏នឹងបង្កើត «យន្តការ» ដើម្បីពន្លឿនការផ្តល់ជំនួយទៅកាន់តំបន់ហ្កាហ្សា តាមរយៈបណ្តាប្រទេសដែលមិនជាប់ពាក់ព័ន្ធក្នុងជម្លោះ។
សេចក្តីសម្រេច អំពាវនាវឱ្យមាន «ចំណាត់ការបន្ទាន់ដើម្បីអនុញ្ញាតភ្លាមៗនូវដំណើរការចូលផ្នែកមនុស្សធម៌ប្រកបដោយសុវត្ថិភាព គ្មានការរារាំង ពង្រីក និងបង្កើតលក្ខខណ្ឌសម្រាប់ការបញ្ចប់ជម្លោះដោយនិរន្តរភាព។ ក្នុងពេលមានកំហឹងជាសកលជុំវិញការកើនឡើងចំនួនអ្នកស្លាប់នៅតំបន់ហ្កាហ្សា ក្នុងសង្គ្រាមរយៈពេល ១១ សប្តាហ៍ រវាងអ៊ីស្រាអែល និងក្រុមហាម៉ាស និងវិបត្តិមនុស្សធម៌ ដែលកាន់តែធ្ងន់ធ្ងរនៅក្នុងតំបន់ហ៊ុមព័ទ្ធប៉ាឡេស្ទីន សហរដ្ឋអាមេរិក បានអនុបវាទ ក្នុងការអនុញ្ញាតឱ្យក្រុមប្រឹក្សាដែលមានសមាជិក ១៥រូប អនុម័តសេចក្តីសម្រេច ដែលពង្រាងដោយប្រទេសអារ៉ាប់រួម។ សហរដ្ឋអាមេរិក និងអ៊ីស្រាអែល ជំទាស់ទៅនឹងបទឈប់បាញ់ ដោយជឿថា វានឹងផ្តល់ប្រយោជន៍ដល់ក្រុមហាម៉ាស។ ជំនួសមកវិញ ទីក្រុងវ៉ាស៊ីនតោន បានគាំទ្រការផ្អាកប្រយុទ្ធដើម្បីការពារជនស៊ីវិល និងដោះលែងចំណាប់ថ្នូរ ដែលត្រូវបានចាប់ខ្លួនដោយក្រុមហាម៉ាស។ អាជ្ញាធរសុខាភិបាលដែនដីប៉ាឡេស្ទីន នៅក្នុងតំបន់ហ្កាហ្សា ដែលគ្រប់គ្រងដោយក្រុមហាម៉ាស បាននិយាយថា មនុស្សជិត ២១.០០០នាក់ បានស្លាប់នៅក្នុងការវាយប្រហាររបស់អ៊ីស្រាអែល ជាមួយនឹងការព្រួយបារម្ភថា មនុស្សច្រើននាក់ទៀត ត្រូវបានកប់នៅក្រោមគំនរបាក់បែក ស្ទើរតែទាំងអស់នៃប្រជាជន ២,៣លាននាក់ នៅហ្កាហ្សា ត្រូវបង្ខំភៀសខ្លួនចេញពីលំនៅឋានរបស់ពួកគេជាច្រើនដង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
