បាល់ទាត់​៖ ក្រុម​ជំរើស​ជាតិ​វែ​ល​បាន​រង​បរាជ័យ ១-០ ក្រោម​ថ្វី​ជើង​ក្រុម​លើ​គេ​ក្នុង​ពូ​ល​អ៊ីតាលី ​តែ​នៅ​តែ​អាច​បន្ត​ដំណើរ​ឡើង​វគ្គ ១៦​ក្រុម​ចុងក្រោយ​ដដែល​នៅ​ព្រឹត្តិការណ៍​​ទ្វីប​អឺរ៉ុប Euro ២០២០​។

​​អ៊ីតាលី​ដែល​ទុក​កីឡាករ​សំខាន់ៗ​មួយ​ចំនួន​សម្រាក ​នៅ​តែ​មាន​ប្រៀប​លើ​វែ​ល​ដែល​ត្រូវការ​ត្រឹម​ស្មើ​។ ​កៅអី​ស្វ័យប្រវត្តិ​របស់​វែ​ល​ត្រូវបាន​គំរាមកំហែង​ដោយ​ក្រុម​ស្វ៊ី​ស ​ដែល​ប្រកួត​ដំណាល់​គ្នា​យកឈ្នះ​ទួ​ក​គី ៣-១​។ ​ចាញ់​អ៊ីតាលី ១-០ ដោយ​គ្រាប់​បាល់​របស់ Matteo Pessina វែ​ល​បាន​ទប់​មិន​អោយ​មាន​គ្រាប់​លើស​ពី​នេះ​ឡើយ​ ទោះបី​បាត់បង់​កីឡាករ​ម្នាក់​នៅ​នាទី​ទី​៥៥ នៅ​ពេល​អាជ្ញា​កណ្ដាល​ឲ្យកាត​ក្រហម Ethan Ampadu ដែល​មាន​កំហុស​លើ Federico Bernardeschi​។​ ​​យោង​តាម​លទ្ធផល​នេះ​វែ​ល​បាន​លេខ​២ ក្នុង​ពូ​ល​មាន ៤​ពិន្ទុ​ស្មើ​ជាមួយ​ស្វ៊ី​ស ​តែ​វែ​ល​មាន​គ្រាប់​បាល់​ចំណេញ ១​គ្រាប់​ ឯ​ស្វ៊ី​ស​ខាត ១​គ្រាប់​បាន​ត្រឹម​លេខ​៣ និង​រង់ចាំ​អ៊ុត​ជាមួយ​ក្រុម​លេខ​៣ ពូ​ល​ផ្សេងទៀត​ដើម្បី​ដឹង​ថា​អាច​ឡើង​ជុំ​បន្ត​បាន ​រឺ​អត់​។

​​ដោយឡែក​ជ័យជំនះ​របស់​អ៊ីតាលី​លើក​នេះ​គឺជា​ប្រកួត​ទី​៣០ របស់​អ៊ីតាលី​មិនដែល​ចាញ់ និង​ជា​ជ័យជំនះ ១១​ប្រកួត​ជាប់​គ្នា​ផង​ដែរ​ ខណៈ​លេខ​១ ក្នុង​ពូ​ល A នេះ​នឹង​ត្រូវ​ជួប​ជាមួយ​ក្រុម​លេខ​២ ក្នុង​ពូ​ល C នៅ​កីឡដ្ឋាន Wembley ខណៈ​វែ​ល​ក្នុងនាម​ជា​ក្រុម​លេខ​២ ក្នុង​ពូ​ល A ត្រូវ​ជួប​ជាមួយ​ក្រុម​លេខ​២ ក្នុង​ពូ​ល B នៅ​ទីក្រុង Amsterdam ប្រទេស​ហូ​ឡង់​៕

​អត្ថបទ​៖​នាង សុភា​វុ​ធ