កងទ័ពអ៊ីស្រាអែលកាលពីថ្ងៃអង្គារ បាននិយាយថា ខ្លួនបានចាប់ខ្លួនអ្នកនយោបាយជាន់ខ្ពស់ប៉ាឡេស្ទីន លោក ស្រី Khalida Jarrar នៅតំបន់វេសបែង( West Bank) ដែលគ្រប់គ្រងដោយអ៊ីស្រាអែល រួមជាមួយនឹងសកម្មជនផ្សេងទៀតនៃគណបក្សឆ្វេងនិយមរបស់ខ្លួន។

លោកស្រី Jarrar មានវ័យអាយុ ៦០ឆ្នាំ គឺជាឥស្សរជនលេចធ្លោម្នាក់ នៅក្នុងរណសិរ្សប្រជាប្រិយសម្រាប់ការរំដោះប៉ាឡេស្ទីន (PFLP) ដែលជាក្រុមប្រឆាំង នៅក្នុងអង្គការរំដោះប៉ាឡេស្ទីន ត្រូវបានចាត់ទុកថា ជាក្រុម «ភេរវកម្ម» ដោយអ៊ីស្រាអែល សហរដ្ឋអាមេរិក និងសហភាពអឺរ៉ុប។

កងទ័ព បាននិយាយនៅក្នុងសេចក្តីថ្លែងការណ៍មួយថា៖«លោកស្រី Khaleda Jarrar ដែលជាភេរវករ ដែលគេតាមចាប់ខ្លួន ត្រូវបានចាប់ខ្លួន ...រួមជាមួយសកម្មជន PFLP ផ្សេងទៀត»។

លោកស្រី Jarrar ត្រូវបានចាប់ខ្លួនដោយកងកម្លាំងអ៊ីស្រាអែល កាលពីខែតុលា ឆ្នាំ ២០១៩ ហើយត្រូវបានដោះលែង នៅខែកញ្ញាឆ្នាំ២០២០ បន្ទាប់ពីត្រូវបានឃុំខ្លួនដោយគ្មានការកាត់ទោស។

ប្តីរបស់លោកស្រី ឈ្មោះ Ghassan Jarrar បានប្រាប់សារព័ត៌មាន AFP ថា ទាហាន បានសម្រុកចូលផ្ទះគ្រួសាររបស់ខ្លួន នៅក្នុងទីក្រុងរ៉ាម៉ាឡា « Ramallah» ដោយបានទម្លាយទ្វារខាងមុខ នៅម៉ោង៥:00 ព្រឹក (0៣:00ម៉ោងសកល)»។