សារព័ត៌មានក្នុងស្រុកបានដកស្រង់សម្តីនគរបាលដែលនិយាយថា តារាសម្តែងកូរ៉េខាងត្បូង លោក លី ស៊ុនឃ្យ៉ុន (Lee Sun-kyun) ដែលទទួលបានភាពល្បីល្បាញដោយសារការសម្ដែងរបស់លោកនៅក្នុងខ្សែភាពយន្តដែលឈ្នះពានរង្វាន់អូស្ការ មានចំណងជើងថា «ប៉ារ៉ាស៊ីត (Parasite)» ត្រូវបានគេរកឃើញថាបានទទួលមរណៈភាព។

តារាសម្តែងវ័យ ៤៨ឆ្នាំរូបនេះត្រូវគេជឿថា បានសន្លប់នៅក្នុងរថយន្តនៅឯសួនឧទ្យានមួយនៅកណ្តាលទីក្រុងសេអ៊ូល នៅថ្ងៃពុធ (២៧ ធ្នូ) នេះ។ ទីភ្នាក់ងារព័ត៌មាន យ៉ុនហាប់ (Yonhap) បាននិយាយថា គេមិនច្បាស់ទេថាតើលោក លី បានសម្លាប់ខ្លួនឬយ៉ាងណា ប៉ុន្តែនគរបាលបានទទួលរបាយការណ៍ថា លោកបានចាកចេញពីផ្ទះបន្ទាប់ពីសរសេរសំបុត្រមួយច្បាប់ ដែលហាក់ដូចជាសំបុត្រធ្វើអត្តឃាត។

លោក លី ត្រូវបានស្ថិតនៅក្រោមការស៊ើបអង្កេតជុំវិញការចោទប្រកាន់ការប្រើប្រាស់គ្រឿងញៀនខុសច្បាប់ ស្របពេលមានការបង្ក្រាបដែលកំពុងបន្តរបស់រដ្ឋាភិបាលលើករណីគ្រឿងញៀន។

សារព័ត៌មាននោះរាយការណ៍ថា លោក លី ត្រូវសង្ស័យថាបានប្រើប្រាស់គ្រឿងញៀនជាមួយបុគ្គលិកនៅក្នុងបារមួយកន្លែងក្នុងទីក្រុងសេអ៊ូល ប៉ុន្តែលោកបាននិយាយថា ទោះបីខ្លួនបានប្រើប្រាស់របស់ដែលត្រូវបានឲ្យដោយបុគ្គលិកម្នាក់នោះក៏ដោយ ក៏លោកមិនបានដឹងថាវាជាថ្នាំញៀនខុសច្បាប់ដែរ។

មានការចាប់អារម្មណ៍យ៉ាងទូលំទូលាយជុំវិញការស៊ើបអង្កេតលើករណីគ្រឿងញៀនរបស់លោក លី ដែលបណ្តាលឱ្យខូចខាតយ៉ាងខ្លាំងដល់កេរ្តិ៍ឈ្មោះរបស់លោក។ តារាសម្តែងដែលបានរៀបការ និងមានកូនប្រុសពីរនាក់ជាមួយតារាសម្តែង ជុន ហេជីន (Jeon Hye-jin) រូបនេះមានអាជីពសម្តែងជាងពីរទសវត្សរ៍មកហើយ៕