នគរបាលអូស្ត្រាលី បាននិយាយថា មនុស្សយ៉ាងហោចណាស់៩ នាក់ បានស្លាប់ បន្ទាប់ពីព្យុះភ្លៀងដ៏ធ្ងន់ធ្ងរ បានវាយប្រហារបណ្ដារដ្ឋនៅភាគខាងកើតរបស់ប្រទេសអូស្ត្រាលី អំឡុងថ្ងៃបុណ្យណូអែល ស្របពេលលំនៅឋានរាប់ម៉ឺនខ្នងនៅតែពុំទាន់មានអគ្គិសនីប្រើប្រាស់ នៅឡើយនៅក្នុងរដ្ឋឃ្វីនលែន (Queensland)។  

នគរបាលរដ្ឋ វីកតូរីយ៉ា (Victoria) និងឃ្វីនលែន បានបញ្ជាក់ពីការស្លាប់មនុស្សចំនួន៩នាក់ ជនរងគ្រោះក្មេងជាងគេបំផុត គឺជាក្មេងស្រីម្នាក់ មានអាយុ៩ឆ្នាំ ដែលសារព័ត៌មានក្នុងស្រុក បានរាយការណ៍ក្មេងស្រីរងគ្រោះត្រូវទឹកហូរគួចនាំចូលក្នុងលូតាមទឹកជំនន់។       

មនុស្សចំនួន១១នាក់ត្រូវបានទឹកហូរគួចចូលទៅក្នុងមហាសមុទ្រ នៅពេលទូករបស់ពួកគេបានក្រឡាប់នៅក្នុងសមុទ្រនៅឆកសមុទ្រម័ររ៉េតុន ( Moreton Bay) ក្នុងភាគខាងត្បូងរដ្ឋឃ្វីនលែន ។ នគរបាលបាននិយាយនៅថ្ងៃពុធនេះថា មនុស្ស៣នាក់ បានលង់ទឹកស្លាប់ ខណៈ៨នាក់ ត្រូវបានជួយសង្រ្គោះចេញពីទឹក និងបញ្ជូនទៅមន្ទីរពេទ្យ ដែលពុំបានគំរាមកំហែងដល់អាយុជីវិតទេ ។

ព្យុះភ្លៀងដ៏ធ្ងន់ធ្ងរ បានវាយប្រហារលើរដ្ឋនានាភាគខាងកើត កាលពីថ្ងៃទី២៥ និង២៦ខែធ្នូ ដែលនាំមកនូវដុំទឹកកកធំៗ ខ្យល់បោកបក់ និងភ្លៀងធ្លាក់ខ្លាំង។ ទន្លេនានាត្រូវបានពេញហៀរដោយទឹកជំនន់ ហើយខ្យល់ខ្លាំងបានបោកបក់បំប៉ើងដំបូលផ្ទះ និងផ្ដួលរម្លើងដើមឈើនៅក្នុងតំបន់រងគ្រោះធ្ងន់ធ្ងរបំផុតមួយចំនួន៕