ប្រធានក្រុមហ៊ុនការពារជាតិរដ្ឋ Rostec បាននិយាយនៅក្នុងសុន្ទរកថា ដែលបានចេញផ្សាយនៅថ្ងៃពុធនេះថា ប្រទេសរុស្ស៊ី នឹងដាក់ពង្រាយកាំភ្លើងផ្លោងថ្មីបំផុតរបស់ខ្លួន ទៅកាន់តំបន់យោធាភាគខាងជើងរបស់ខ្លួន ដែលមានព្រំប្រទល់ជាប់ប្រទេសហ្វាំងឡង់ និងន័រវែស។

លោក Sergei Chemezov ប្រធានក្រុមហ៊ុន Rostec បានប្រាប់ទីភ្នាក់ងារសារព័ត៌មាន RIA របស់រដ្ឋក្នុងបទសម្ភាសន៍មួយថា ការសាកល្បងកាំភ្លើងធំបាញ់ស្វ័យកម្មប្រភេទ Coalition-SV ថ្មី ត្រូវបានបញ្ចប់ ហើយការផលិតដ៏ធំរបស់ពួកគេ បានចាប់ផ្តើមរួចហើយ។

លោកបានបន្តថា ក្រុមអ្នកបើកយានបំពាក់ដោយកាំភ្លើងផ្លោងដំបូង នឹងត្រូវប្រគល់ជូន នៅចុងឆ្នាំ២០២៣នេះ។

លោក Chemezov បាននិយាយថា៖«ខ្ញុំគិតថា ពួកគេនឹងបង្ហាញខ្លួននៅទីនោះ (នៅក្នុងតំបន់យោធាភាគខាងជើង) ក្នុងពេលឆាប់ៗនេះ ដោយសារអ្នកបាញ់កាំភ្លើងប្រភេទនេះ ត្រូវការជាចាំបាច់ ដើម្បីផ្តល់អត្ថប្រយោជន៍ជាងគំរូកាំភ្លើងធំលោកខាងលិចទាក់ទងនឹងរយៈចម្ងាយបាញ់។

នៅឆ្នាំ ២០២១ ប្រធានាធិបតីរុស្ស៊ី វ្ល៉ាឌីមៀ ពូទីន បានផ្លាស់ប្តូរស្ថានភាពនៃកងនាវាចរណ៍ខាងជើងរបស់  រុស្ស៊ីដែលតំបន់ទទួលខុសត្រូវចម្បង គឺតំបន់អាក់ទិករបស់រុស្ស៊ី ទៅជាតំបន់យោធាភាគខាងជើង ដោយបញ្ចូលទៅក្នុងនោះផងដែរគឺតំបន់ Murmanskដែលមានព្រំប្រទល់ជាមួយប្រទេសហ្វាំងឡង់ និងន័រវែស។