សារព័ត៌មាន Financial Times (FT) បានរាយការណ៍កាលពីថ្ងៃទី ២៦ ខែធ្នូថា សហភាពអឺរ៉ុប កំពុងបង្កើតផែនការផ្អែកលើបំណុល ដែលមានតម្លៃរហូតដល់ ២០ពាន់លានអឺរ៉ូ ដើម្បីផ្តល់មូលនិធិដល់ប្រទេសអ៊ុយក្រែន។

អ្នកផ្តល់ប្រាក់កម្ចីរបស់សហភាពអឺរ៉ុប នៅដើមខែធ្នូនេះ បានបរាជ័យក្នុងការឈានដល់កិច្ចព្រមព្រៀងស្តីពីអ៊ុយក្រែនដែលមានតម្លៃ ៥០ពាន់លានអឺរ៉ូ។ នៅពេលដែលការចំណាយក្នុងសម័យសង្រ្គាម បន្តកើនឡើង ទីក្រុងគីវ ត្រូវការជំនួយកាន់តែច្រើនឡើង ដើម្បីទប់ទល់នឹងវិបត្តិហិរញ្ញវត្ថុ។

ទីក្រុងវ៉ាស៊ីនតោន ក៏កំពុងតស៊ូក្នុងការទទួលបានមូលនិធិបន្ថែមទៀតសម្រាប់អ៊ុយក្រែនផងដែរ ខណៈដែលកញ្ចប់ ៦១ពាន់លានដុល្លារ ដែលមានបំណងសម្រាប់ទីក្រុងគីវ នៅតែជាប់គាំង នៅក្នុងសភា។ រហូតមកដល់ពេលនេះ សហរដ្ឋអាមេរិក បានយល់ព្រមផ្តល់ជំនួយចំនួន ១១៣ ពាន់លានដុល្លារដល់អ៊ុយក្រែន រួមទាំងជំនួយយោធាផ្ទាល់ជិត ៤៧ ពាន់លានដុល្លារផងដែរ។

យុទ្ធសាស្ត្រថ្មីរបស់សហភាពអឺរ៉ុបពាក់ព័ន្ធនឹងរដ្ឋជាសមាជិក ដែលចេញការធានាអធិបតេយ្យភាពចំពោះថវិការបស់សហភាពអឺរ៉ុប ដែលអនុញ្ញាតឲ្យគណៈកម្មការអឺរ៉ុបចេញបំណុលថ្មីចំនួន ២០ពាន់លានអឺរ៉ូដែលបានកំណត់សម្រាប់ទីក្រុងគីវ។

គម្រោងនេះ គឺស្រដៀងគ្នាទៅនឹងរចនាសម្ព័ន្ធ ដែលបានប្រើក្នុងឆ្នាំ ២០២០ នៅពេលដែលសហភាពអឺរ៉ុបស្វែងរកការធានាផ្នែកហិរញ្ញវត្ថុដែលមានតំលៃទាបសម្រាប់ការឆ្លើយតបការផ្តល់មូលនិធិទៅនឹងជំងឺរាតត្បាតCovid។