ក្រុមឧទ្ទាម ហ៊ូទី (Houthi) គាំទ្រដោយអ៊ីរ៉ង់ នៅក្នុងប្រទេសយ៉េម៉ែន កាលពីថ្ងៃអង្គារ (២៦ ធ្នូ) បានអះអាងថាបានវាយប្រហារថ្មីដោយមីស៊ីលលើនាវានៅសមុទ្រក្រហម និងការវាយប្រហារដោយយានដ្រូនឆ្ពោះទៅរកអ៊ីស្រាអែល ក្នុងសាមគ្គីភាពជាមួយតំបន់ហ្កាហ្សា។

នៅក្នុងសេចក្តីថ្លែងការណ៍មួយ ក្រុមឧទ្ទាមនេះបាននិយាយថា ពួកគេ «អនុវត្តប្រតិបត្តិការកំណត់គោលដៅប្រឆាំងនឹងនាវាពាណិជ្ជកម្ម» ដែលពួកគេបានកំណត់ថាជានាវា អឹមអេសស៊ី យ៉ូណាយធីត (MSC UNITED) និងបានបាញ់បង្ហោះ «យានដ្រូនជាច្រើនគ្រឿងប្រឆាំងនឹងគោលដៅយោធា» នៅភាគខាងត្បូងអ៊ីស្រាអែល។

ការវាយប្រហារនេះ គឺជាការវាយប្រហារចុងក្រោយបំផុតដោយយានដ្រូន និងមីស៊ីលដែលបាញ់ដោយពួកឧទ្ទាម ចាប់តាំងពីការចាប់ផ្តើមនៃសង្គ្រាមអ៊ីស្រាអែល និងក្រុមហាម៉ាស កាលពីថ្ងៃទី០៧ ខែតុលា មក។

ក្រុមហ៊ូទី បាននិយាយថា ពួកគេកំពុងកំណត់គោលដៅលើអ៊ីស្រាអែល និងនាវាដែលមានទំនាក់ទំនងជាមួយអ៊ីស្រាអែល ដើម្បីជំរុញឱ្យមានការបញ្ឈប់ការវាយលុកនៅតំបន់ហ្កាហ្សាស្ទ្រីប ជាទីដែលអ៊ីស្រាអែល កំពុងប្រយុទ្ធជាមួយពួកសកម្មប្រយុទ្ធហាម៉ាស។

កាលពីព្រឹកថ្ងៃអង្គារ ប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស (UKMTO) បាននិយាយថា «ការផ្ទុះបានលាន់ឮ ហើយមីស៊ីលត្រូវបានគេមើលឃើញ» នៅជិតកំពង់ផែ ហូដៃដា (Hodeida) នៅលើឆ្នេរសមុទ្រភាគខាងលិចរបស់ប្រទេសយេម៉ែន ដោយបន្ថែមថានាវាដឹកជញ្ជូននោះ និងក្រុមនាវិកមានសុវត្ថិភាព៕