រដ្ឋាភិបាលចិន នៅថ្ងៃពុធ (២៧ ធ្នូ) នេះបានគំរាមដាក់ទណ្ឌកម្មពាណិជ្ជកម្មបន្ថែមទៀតលើកោះតៃវ៉ាន់ ប្រសិនបើគណបក្សកាន់អំណាច «រឹងចចេស» ប្រកាន់ខ្ជាប់នូវការគាំទ្រឯករាជ្យ នៅក្នុងការបង្កើនសង្គ្រាមពាក្យសម្ដីបន្ថែមទៀត ខណៈដែលការបោះឆ្នោតនៅកោះតៃវ៉ាន់ ខិតជិតមកដល់នៅខែក្រោយនេះ។

ការបោះឆ្នោតមេដឹកនាំ និងសភានៅថ្ងៃទី១៣ ខែមករា ខាងមុខនេះរបស់កោះតៃវ៉ាន់ នឹងប្រព្រឹត្តទៅ ខណៈប្រទេសចិន ដែលចាត់ទុកកោះនេះជាទឹកដីរបស់ខ្លួន បានព្យាយាមបង្ខំតៃវ៉ាន់ឱ្យទទួលយកការទាមទារអធិបតេយ្យភាពរបស់ចិន។

កោះតៃវ៉ាន់ក្នុងខែនេះ បានចោទប្រកាន់ចិនពីការបង្ខិតបង្ខំផ្នែកសេដ្ឋកិច្ច និងការជ្រៀតជ្រែកក្នុងការបោះឆ្នោត បន្ទាប់ពីទីក្រុងប៉េកាំង បានប្រកាសបញ្ចប់ការកាត់បន្ថយពន្ធលើការនាំចូលសារធាតុគីមីមួយចំនួនពីកោះនេះ ដោយនិយាយថា ក្រុងតៃប៉ិ បានរំលោភលើកិច្ចព្រមព្រៀងពាណិជ្ជកម្មរវាងភាគីទាំងពីរដែលបានចុះហត្ថលេខាកាលពីឆ្នាំ២០១០។

ថ្លែងនៅក្នុងសន្និសីទសារព័ត៌មានជាប្រចាំនៅទីក្រុងប៉េកាំង លោក ចិន ប៊ីនហ័រ (Chen Binhua) អ្នកនាំពាក្យការិយាល័យកិច្ចការកោះតៃវ៉ាន់របស់ប្រទេសចិន បាននិយាយថា កោះតៃវ៉ាន់កំពុងប្រឈមមុខនឹងផ្លូវទាលើពីកន្លែងដែលត្រូវទៅមុខបន្ទាប់ ហើយអ្វីៗអាចត្រូវបានពិភាក្សាដោយផ្អែកលើការប្រឆាំងនឹងឯករាជ្យភាពរបស់កោះតៃវ៉ាន់។ លោកបានបញ្ជាក់ជាថ្មីថា ឯករាជ្យភាពកោះតៃវ៉ាន់ មានន័យថាសង្រ្គាមនឹងកើតមានឡើង៕