ក្រសួងសុខាភិបាលរបស់ប្រទេសថៃ កំពុងតាមដានយ៉ាងដិតដល់ ចំពោះទឹកជំនន់ នៅតំបន់ភាគខាងត្បូងរបស់ប្រទេសនេះ ដោយធ្វើការកត់សម្គាល់ថា ពេលនេះ ស្ថានភាពបានប្រសើរឡើងបន្តិចហើយនៅទូទាំងខេត្តចំនួន៥ ដែលរងផលប៉ះពាល់ រួមមាន Songkhla (សុងក្លា) Pattani (ប៉ាតានី) Yala (យ៉ាឡា) Narathiwat (ណារ៉ាធីវ៉ាត) និង Satun (សាទូន)។

រដ្ឋមន្ត្រីក្រសួងសុខាភិបាលលោក Cholnan Srikaew កាលពីថ្ងៃ (ទី២៦ ខែធ្នូ) បាននិយាយថា របាយការណ៍ពីនាយកដ្ឋានសុខភាពសាធារណៈផ្នែកសង្គ្រោះបន្ទាន់ បង្ហាញពីស្ថានភាព ដែលពាក់ព័ន្ធនឹងគ្រោះមហន្តរាយធម្មជាតិទឹកជំនន់ និងបំណាក់ដី នៅតំបន់ភាគខាងត្បូង អំឡុងថ្ងៃទី ២២-២៦ ខែធ្នូ។ ស្ថានភាពនៅតែជាក្តីបារម្ភដដែល ក្នុងខេត្តទាំង៥ នោះ ដោយប៉ះពាល់ដល់ពលរដ្ឋសរុបចំនួន ១៨.៤០២គ្រួសារ។

របាយការណ៍បឋម រួមមានអ្នកស្លាប់ម្នាក់ ដោយសារលង់ទឹក នៅខេត្តយ៉ាឡា របួសម្នាក់ និងការប៉ះពាល់ដល់មណ្ឌលសុខភាពចំនួន ១២កន្លែង ដែលមានមន្ទីរពេទ្យចំនួន២ ការិយាល័យសុខាភិបាលស្រុកចំនួន១ និងមន្ទីរពេទ្យបង្អែកស្រុកចំនួន៩ នៅទូទាំងខេត្តណារ៉ាធីវ៉ាត និងខេត្តយ៉ាឡា ដោយខេត្តនីមួយៗ មានចំនួន ៦ដូចគ្នា។ ក្នុងចំណោមទីកន្លែងថែទាំសុខភាព ដែលរងផលប៉ះពាល់ទាំងនោះ ទីកន្លែងចំនួន ១០នៅតែបិទទ្វារដដែល។

សេវាកម្មសំខាន់ៗ បានពង្រីកជំនួយផ្នែកវេជ្ជសាស្រ្ដដល់ ៨ករណីដែលទទួលរងផលប៉ះពាល់ សរុបចំនួន៤.២០០កញ្ចប់។ ក្រសួងសុខាភិបាល បានជំរុញឲ្យតាមដានជាប្រចាំ ចំពោះបរិមាណទឹកដ៏ហៀរហូរ និងទឹកជំនន់ នៅថ្ងៃទី ២៨-២៩ ខែធ្នូ។ ជាមួយគ្នានេះ ក្រសួងបានបង្កើតមជ្ឈមណ្ឌលប្រតិបត្តិការសង្គ្រោះបន្ទាន់ និងសុខភាពសាធារណៈ នៅខេត្តយ៉ាឡា និងណារ៉ាធីវ៉ាត។

ហើយលោករដ្ឋមន្ត្រី បានបញ្ជាក់ថា វិធានការបង្ការទុកជាមុន រួមមានការណែនាំដល់មន្ត្រីសុខាភិបាលខេត្ត និងអ្នកគ្រប់គ្រងមណ្ឌលសុខភាព ឲ្យរៀបចំថ្នាំ និងការផ្គត់ផ្គង់ថ្នាំពេទ្យ បង្កើតក្រុមឆ្លើយតបវេជ្ជសាស្រ្ត និងរៀបចំផែនការសង្គ្រោះបន្ទាន់ឲ្យបានទូលំទូលាយ ទាំងនៅមុន និងអំឡុងពេលមានគ្រោះមហន្តរាយបែបនេះ៕