ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នៅឆ្នាំ២០២៤ខាងមុខនេះ នឹង​បន្ត​អនុវត្ត​ជា​ផ្លូវ​ការ​លើការងារអាទិភាពចំនួន ៤ចំណុចផ្សេងទៀត បន្ទាប់ពីការងារ២ចំណុច ត្រូវបានប្រកាស​ដាក់​​ឲ្យ​អនុវត្តជាផ្លូវការ កាលខែវិច្ឆិកាកន្លងទៅ ដែលជាការ​ណែនាំ​របស់​ប្រមុ​ខរាជ​រដ្ឋាភិបាលនីតិកាលទី៧ នៃរដ្ឋសភា។

សូមរម្លឹកថា កាលពីថ្ងៃទី១៤ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋ​មន្រ្តី​នៃកម្ពុជា បានប្រកាសដាក់ឲ្យអនុវត្តជាផ្លូវការការងារអាទិភាពចំនួន២ រួមមាន របប​សន្តិសុខ​សង្គម​ផ្នែកថែទាំសុខភាពតាមរបបភាគទានដោយស្ម័គ្រ​ចិត្ត​សម្រាប់​បុគ្គល​ស្វ័យ​និយោជន៍ និងអ្នកក្នុងបន្ទុកសមាជិក ប.ស.ស. និងកម្មវិធី​បណ្តុះបណ្តាល​ជំនាញ​វិជ្ជាជីវៈ និង​បច្ចេកទេស សម្រាប់​យុវជនមកពីគ្រួសារក្រីក្រ និងគ្រួសារងាយរងហានិភ័យ ក្នុងចំណោម​ការងារ​ចំនួន ៦​ចំណុច សំដៅបង្កើនប្រាក់ចំណូល ការធានាលក្ខខណ្ឌការងារល្អប្រសើរ ការពង្រឹង​សុខដុម​នីយកម្មក្នុងទំនាក់ទំនងវិជ្ជាជីវៈ កិច្ចគាំពារសង្គម និងជំនាញវិជ្ជាជីវៈ ជូនកម្មករនិយោជិត និង​ក្រុមគ្រួសារ។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅ​ល្ងាចថ្ងៃទី២៦ ខែធ្នូ ឆ្នាំ២០២៣នេះ បានឲ្យ ប៊ីធីវី ដឹងថា ការងារអាទិភាពចំនួន៤ ដែល​ក្រសួង​ការងារ នឹងត្រូវអនុវត្តបន្តទៀតនៅពេលខាងមុខ មានដូចជា៖ ១.សិក្សាលទ្ធភាពដើម្បីបង្កើតទារកដ្ឋាន និងមតេយ្យសហគមន៍ នៅតាម​តំបន់​ដែល​មាន​រោងចក្រ, ​២.សហការជាមួយភាគីពាក់ព័ន្ធ ជំរុញកែលម្អកន្លែងហូបបាយ ឬអាហារដ្ឋាន​នៅ​តាម​រោង​ចក្រ, ៣.សហការជាមួយភាគីពាក់ព័ន្ធ ដើម្បីសិក្សាយន្តការគាំទ្រ និង​លើក​ទឹក​ចិត្ត​ឲ្យ​មាន​ការ​ផ្លាស់ប្តូរ​ជា​បណ្តើរៗនូវមធ្យោបាយដឹកជញ្ជូនកម្មករនិយោជិត និង ៤.ជំរុញ​កម្ម​វិ​ធី​ធ្វើ​តេស្ត​ទទួល​ស្គាល់​ជំនាញ ដែលជា​ឱកាស​សម្រាប់​កម្មករ​និយោជិត​ទាំង​ក្នុង​ និង​ក្រៅ​ប្រទេស​ឲ្យ​អាច​ទទួល​បាន​វិញ្ញាបន​បត្រ​ទទួលស្គាល់ជំនាញមួយ។

ឯកឧត្តម បានបញ្ជាក់ថា ការងារសំខាន់ៗទាំងអស់ខាងលើនេះ កំពុងស្ថិតក្នុងការសិក្សា ដើម្បី​ត្រៀម​បន្ត​អនុវត្តជាផ្លូវការចាប់ពីឆ្នាំ២០២៤ខាងមុខតទៅ ដែលស្រប​អនុសាសន៍​ណែនាំ​របស់​សម្តេច​នាយករដ្ឋមន្រ្តីនៃកម្ពុជា៕

អត្ថបទ៖ឈិត បូរ៉ាវី