ទីក្រុងចំនួន២ នៅភាគពាយ័ព្យនៃប្រទេសចិន គឺទីក្រុង Xian និង Yinchuan បានណែនាំអ្នកស្រុកឲ្យស្នាក់នៅក្នុងផ្ទះ កម្រិតផលិតកម្មរបស់ឧស្សាហកម្មធុនធ្ងន់ និងបញ្ឈប់ការកែច្នៃធ្យូងថ្ម ដោយព្រមានពីការបង្កកខ្វក់ខ្លាំងដល់បរិកាស ក្នុងរយៈពេលប៉ុន្មានថ្ងៃខាងមុខនេះ ជាមួយនឹងការរំពឹងទុកពីការមានអ័ព្ទដ៏ក្រាស់។

ក្រុមសង្កេតការណ៍ឧតុនិយមបជ្ឈិមរបស់ប្រទេសចិន ក៏បានព្យាករពីអ័ព្ទដ៏ក្រាស់ នៅភាគខាងជើង និងខាងកើតរបស់ប្រទេសដែរ ចាប់ពីព្រឹកថ្ងៃព្រហស្បតិ៍ (ទី២៨ ខែធ្នូ) ដល់ថ្ងៃសៅរ៍ (ទី៣០ ខែធ្នូ) មុនពេលរលកខ្យល់ត្រជាក់បក់ទៅដល់នៅរសៀលថ្ងៃសៅរ៍នោះ ដើម្បីបំបែកសំណុំអ័ព្ទ។

នៅទីក្រុង Xian របស់ខេត្ត Shaanxi អាជ្ញាធរបានចេញការព្រមានពណ៌ក្រហម នៅថ្ងៃពុធ (ទី២៧ ខែធ្នូ) នេះ ដោយរំពឹងថា នឹងមានការបំពុលធ្ងន់ធ្ងរ រហូតដល់ថ្ងៃសុក្រ (ទី២៩ ខែធ្នូ) ហើយបានអនុវត្តវិធានការបន្ទាន់ចាំបាច់ ដើម្បីកាត់បន្ថយការបំភាយឧស្ម័ន ដោយរួមទាំងស្នើសុំឲ្យសាធារណជនប្រើប្រាស់មធ្យោបាយធ្វើដំណើរសាធារណៈ និងក្រុមហ៊ុននានា ដើម្បីអនុញ្ញាតឲ្យមានការរៀបចំការងារ ដែលអាចបត់បែនបាន។

ទូរទស្សន៍រដ្ឋ CCTV បានរាយការណ៍ថា ទីក្រុងបានស្នើសុំឲ្យបណ្ដាក្រុមហ៊ុន ស្ថាប័ន និងការដ្ឋានសំណង់ដែលបញ្ចេញការបំពុលកែសម្រួលកាលវិភាគផលិតកម្ម និងកាត់បន្ថយការបំភាយឧស្ម័នដោយសកម្មជាមុន។ ចំណែករដ្ឋធានីនៃតំបន់ Ningxia របស់ទីក្រុង Yinchuan បានធ្វើឲ្យសកម្មឡើងវិញនូវវិធានការនានា ចាប់ពីរសៀលថ្ងៃអង្គារ (ទី២៦ ខែធ្នូ) ដើម្បីកាត់បន្ថយការបំភាយផ្សែងពុលជាង ២០ភាគរយ ខណៈពេលដែលធានាឲ្យបណ្ដាសហគ្រាសទាំងនោះបន្តលក្ខខណ្ឌប្រតិបត្តិការធម្មតា។

រូបថតពីសេវាកម្មព័ត៌មានចិន បានបង្ហាញថា ការបំពុលកម្រិតមធ្យម ត្រូវបានព្យាកររហូតដល់ថ្ងៃសុក្រ នៅក្នុងទីក្រុង Yinchuan ដែលគ្របដណ្តប់ដោយពណ៌ប្រផេះ ជាមួយនឹងឱកាសនៃការបំពុលធ្ងន់ធ្ងរ នៅថ្ងៃព្រហស្បតិ៍៕