ប្រទេសកូរ៉េខាងត្បូង ដាក់ទណ្ឌកម្មលើជនជាតិកូរ៉េខាងជើងចំនួនប្រាំបីនាក់ ដែលពាក់ព័ន្ធទៅនឹងការជួញដូរសព្វាវុធដែលត្រូវបានហាមឃាត់ និងសកម្មភាពតាមអ៊ីនធឺណិតខុសច្បាប់។

ក្រសួងការបរទេសកូរ៉េខាងត្បូង បានប្រកាសពីចំណាត់ការនៅថ្ងៃពុធនេះ។ វិធានការត្រូវបានធ្វើឡើងបន្ទាប់ពីប្រទេសកូរ៉េខាងជើង បានធ្វើសមយុទ្ធបាញ់មីស៊ីលប្រើឥន្ធនៈរឹង Hwasong-18 នៃមីស៊ីលបាលីស្ទីកអន្តរទ្វីប កាលពីសប្តាហ៍មុន។

គោលដៅថ្មីរួមមានទាំងលោក Ri Chang Ho ប្រធានការិយាល័យទូទៅស៊ើបការណ៍របស់ប្រទេសកូរ៉េខាងជើង។ ក្រសួងបាននិយាយថា លោក Ri បានជាប់ពាក់ព័ន្ធក្នុងសកម្មភាពអ៊ីនធឺណិតខុសច្បាប់ ដែលធ្វើឡើងដោយចោរព័ត៌មានវិទ្យា ធ្វើការក្រោមការគ្រប់របស់ការិយាល័យនេះ។ ក្រសួងនិយាយបន្ថែមថារូបិយប័ណ្ណបរទេស ដែលរកបានតាមរយៈប្រតិបត្តិការ ត្រូវបានប្រើប្រាស់ដើម្បីផ្តល់ហិរញ្ញវត្ថុ ដល់កម្មវិធីអភិវឌ្ឍន៍នុយក្លេអ៊ែរ និងមីស៊ីល។

ក្រសួងនិយាយថា បុគ្គល៧នាក់ផ្សេងទៀត បានជាប់ពាក់ព័ន្ធក្នុងការជួញដូរសព្វាវុធ ដែលត្រូវបានហាមឃាត់ក្រោមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ក្រសួងបានបញ្ជាក់ថា ទីក្រុងសេអ៊ូល នឹងបន្តកិច្ចសហប្រតិបត្តិការយ៉ាងជិតស្និទ្ធជាមួយសហរដ្ឋអាមេរិក ជប៉ុន និងសហគមន៍អន្តរជាតិ ដើម្បីបញ្ឈប់ទីក្រុងព្យុងយ៉ាងមិនឲ្យធ្វើសកម្មភាពបង្កហេតុ និងជំរុញឱ្យចូលរួមឡើងវិញកិច្ចពិភាក្សាលុបបំបាត់នុយក្លេអ៊ែរ។

នេះជាលើកទី ១៤ ហើយ ដែលរដ្ឋបាលរបស់ប្រធានាធិបតី លោក Yoon Suk-yeol បានប្រកាសដោយឯករាជ្យនូវការដាក់ទណ្ឌកម្មប្រឆាំងកូរ៉េខាងជើង។