អាជ្ញាធរ នៅថ្ងៃពុធ (ទី២៧ ខែធ្នូ) នេះ បាននិយាយថា ទឹកជំនន់នៅភាគខាងត្បូងប្រទេសថៃ បានសម្លាប់មនុស្សយ៉ាងហោចណាស់ ៦នាក់ ព្រមទាំងប៉ះពាល់រាប់ម៉ឺនគ្រួសារទៀត។

មន្ត្រីក្នុងតំបន់បានឲ្យដឹងថា ទឹកជំនន់ដែលបានចាប់ផ្តើមនៅថ្ងៃទី២២ ខែធ្នូនេះ បានប៉ះពាល់ដល់ផ្ទះសម្បែងជាង ៧០.០០០ខ្នង នៅទូទាំងខេត្ត Satun, Songkhla, Pattani, Yala និង Narathiwat។

អភិបាលខេត្តរង លោក Preecha Nualnoi បានប្រាប់សារព័ត៌មាន AFP ថា ជនរងគ្រោះទាំង ៦នាក់នោះ ដែលរួមមានទាំងស្ត្រីវ័យ ៨៩ឆ្នាំម្នាក់ និងក្មេងទើបចេះដើរម្នាក់ បានស្លាប់ នៅខេត្ត Narathiwat។ លោកបន្តថា មនុស្សម្នាក់ទៀតនៅបាត់ខ្លួន បន្ទាប់ពីមានភ្លៀងធ្លាក់ខ្លាំងជាច្រើនថ្ងៃ ដែលបានបង្កឲ្យមានទឹកជំនន់ឡើងដល់កម្ពស់ ៣ម៉ែត្រ នៅកន្លែងខ្លះ។

ខ្សែវីដេអូប្រព័ន្ធផ្សព្វផ្សាយក្នុងស្រុក បានបង្ហាញពីផ្លូវ ដែលលិចដោយទឹកជំនន់ភក់ ហើយអ្នកស្រុកជ្រកនៅលើដំបូលផ្ទះ៕