នាវាពិឃាតរបស់កងទ័ពជើងទឹក Laboon និងគ្រឿងយុទ្ធោបរណ៍ផ្សេងទៀតរបស់សហរដ្ឋអាមេរិក បានបាញ់ទម្លាក់យានដ្រូនជាង១០គ្រឿង និងមីស៊ីលជាច្រើនគ្រាប់ នៅក្នុងសមុទ្រក្រហម កាលពីថ្ងៃអង្គារ ប៉ុន្មានថ្ងៃបន្ទាប់ពីនាវានេះ បានបាញ់ទម្លាក់យានដ្រូនចំនួន ៤គ្រឿងនៅក្នុងដែនទឹកតែមួយ។

ឧប្បត្តិហេតុនេះ គឺជាវគ្គចុងក្រោយបង្អស់ ដែលនាវាចម្បាំងអាមេរិក នៅមជ្ឈិមបូព៌ា បានស្ទាក់យានដ្រូន និងមីស៊ីល ដែលក្រុមមន្ត្រីអះអាងថា មានប្រភពមកពីក្រុមឧទ្ទាមហួទីដែលមានសម្ព័ន្ធភាពជាមួយអ៊ីរ៉ង់ក្នុងប្រទេសយេម៉ែន ចំពេលមានភាពតានតឹងកាន់តែខ្លាំងឡើង នៅក្នុងតំបន់ដែលផ្តើមចេញពីសង្គ្រាម    អ៊ីស្រាអែល-ហាម៉ាស។

យោងតាមបញ្ជាការកណ្តាលរបស់សហរដ្ឋអាមេរិក គ្រឿងយុទ្ធោបរណ៍របស់អាមេរិករួមមាននាវាពិឃាដ Laboon និងយន្តហោះចម្បាំង F/A-18 Super Hornets មកពី Eisenhower Carrier Strike Group       «បានបាញ់យានដ្រូន ចំនួន ១២ គ្រឿង និងមីស៊ីលប្រឆាំងនាវាចំនួន ៣គ្រាប់និងមីស៊ីលតម្រង់គោលដៅ វាយប្រហារពីលើដីចំនួនពីរគ្រាប់ នៅក្នុងសមុទ្រក្រហមភាគខាងត្បូង ដែលត្រូវបានក្រុមឧទ្ទាមហួទីបាញ់ក្នុងរយៈពេល១០ម៉ោង កាលពីថ្ងៃអង្គារ។

ទីបញ្ជាការកណ្តាល CENTCOM បាននិយាយថា៖«មិនមានការខូចខាតដល់នាវានៅក្នុងតំបន់ ឬរាយការណ៍ពីការរងរបួសទេ»។