នៅថ្ងៃពុធនេះ ប្រជាពលរដ្ឋរស់នៅក្នុងទីក្រុង Tulkarm ស្ថិតក្នុងតំបន់កាន់កាប់វ៉េសប៊ែង បាននិយាយថា ក្រុមយុវជនគ្មានកំហុស ៦នាក់ ត្រូវបានសម្លាប់ដោយសារការវាយប្រហារដោយយានដ្រូនរបស់អ៊ីស្រាអែល អំឡុងការវាយឆ្មក់របស់ពួកគេលើជំរំជនភៀសខ្លួន Nour Shams ។

ដោយឡែក ក្រសួងសុខាភិបាលប៉ាឡេស្ទីន និយាយនៅថ្ងៃពុធនេះដែរថា មនុស្ស ៦នាក់ ត្រូវបានសម្លាប់អំឡុងការវាយឆ្មក់របស់អ៊ីស្រាអែល ។

ប្រជាពលរដ្ឋអះអាងថា ក្រុមយុវជន មិនមែនជាក្រុមអ្នកសកម្មប្រយុទ្ធនោះទេ ហើយពួកគេនៅឆ្ងាយពីតំបន់រងការវាយឆ្មក់ ជាកន្លែងដែលការប៉ះទង្គិចគ្នាបានផ្ទុះឡើង ។

បុរសម្នាក់និយាយថា យុវជនមួយចំនួនដែលរស់រានពីការវាយប្រហារនេះ បានស្លាប់តាមក្រោយនៅក្នុងរថយន្តគិលានសង្រ្គោះ ដែលកងកម្លាំងអ៊ីស្រាអែលរារាំងមិនឲ្យពួកគេចាកចេញពីតំបន់នោះ ។

បណ្តាញព័ត៌មានប៉ាឡេស្ទីន WAFA រាយការណ៍ថា ក្រុមយុវជនដែលបានស្លាប់ មានអាយុចន្លោះពី ១០ឆ្នាំជាង និងជាង ២០ឆ្នាំ ។

យោងតាមការអះអាងរបស់សាក្សីម្នាក់ និយាយថា អំឡុងការវាយឆ្មក់នោះ កងកម្លាំងអ៊ីស្រាអែលបានឈូសឆាយផ្លូវ បញ្ជូនក្រុមបាញ់កាំភ្លើងស៊ីប និងបាញ់ប្រហារលើផ្ទះសម្បែងប្រជាពលរដ្ឋ ហើយនិងបំផ្ទុះរថយន្តមួយគ្រឿង ។

សូមបញ្ជាក់ថា អំពើហិង្សា បានកើនឡើននៅក្នុងតំបន់វ៉េសប៊ែង តាំងពីពេលមុនសង្រ្គាមនៅតំបន់ហ្គាហ្សាផ្ទុះឡើង ទៅទៀត បន្ទាប់ពីការវាយប្រហាររបស់ក្រុមហាម៉ាស់លើអ៊ីស្រាអែលកាលពីថ្ងៃទី ៧ ខែតុលា ។

ជនប៉ាឡេស្ទីនយ៉ាងហោច ៣០០នាក់ ត្រូវបានសម្លាប់នៅក្នុងតំបន់វ៉េសប៊ែង ចាប់តាំងពីពេលនោះមក ៕