ក្រុមហ៊ុនអាមេរិក ដែលស្រាវជ្រាវឧស្សាហកម្មភស្តុភារ បាននិយាយថា ប្រតិបត្តិការនៃនាវាពាណិជ្ជកម្មជាច្រើន នៅក្នុងសមុទ្រក្រហម ត្រូវបានរងផលប៉ះពាល់ ខណៈដែលក្រុមហ៊ួទីប្រឆាំងរដ្ឋាភិបាលរបស់ប្រទេសយេម៉ែន បន្តវាយប្រហារនាវា នៅក្នុងតំបន់នោះ។

ក្រុមហ៊ុនស្រាវជា្រវ Project44 ឲ្យដឹងថា គិតត្រឹមថ្ងៃអង្គារ (ទី២៦ ខែធ្នូ) ប្រតិបត្តិការនៃនាវាពាណិជ្ជកម្មចំនួន ១៨៥គ្រឿង ត្រូវបានរងផលប៉ះពាល់។ ក្រុមហ៊ុននេះប៉ាន់ស្មានថា នាវា ១៥៧គ្រឿង ក្នុងចំណោមនោះ កំពុងប្ដូរផ្លូវធ្វើដំណើរ ជុំវិញជ្រោយ Cape of Good Hope នៅអាហ្វ្រិកខាងត្បូងវិញ។

ក្រុមហ៊ុនបញ្ជាក់ថា ភាគច្រើននៃនាវា ដែលបានប្តូរផ្លូវ នឹងកើនឡើងនៃរយៈពេលធ្វើដំណើរពី ៧ ទៅ ២០ថ្ងៃ ដើម្បីទៅដល់គោលដៅ។ ក្រុមហ៊ុនបន្ថែមថា ថ្លៃដឹកជញ្ជូនក៏ឡើងខ្ពស់ផងដែរ ដោយសារនាវាមួយចំនួន ដែលបានប្តូរផ្លូវនេះ បានបង្កើនល្បឿនរបស់ខ្លួន។

ពាក់ព័ន្ធនឹងការវាយប្រហារលើនាវានេះ សហរដ្ឋអាមេរិកបានបង្កើតគំនិតផ្តួចផ្តើមចម្រុះជាតិសាសន៍មួយ ដើម្បីជួយធានាសុវត្ថិភាពឆ្លងកាត់តំបន់នោះ។ ទីបញ្ជាការកណ្តាលរបស់អាមេរិកនិយាយថា កងកម្លាំងរបស់ខ្លួន បានបាញ់ទម្លាក់យានដ្រូនចំនួន ១២គ្រឿង មីស៊ីលបាលីស្ទិកចំនួន ៣គ្រាប់ និងមីស៊ីលតម្រង់គោលដៅចំនួន ២គ្រាប់ នៅសមុទ្រក្រហមភាគខាងត្បូង ដែលបាញ់ដោយក្រុមហ៊ួទី ក្នុងរយៈពេល ១០ម៉ោង ចាប់ពីព្រឹកថ្ងៃអង្គារ។

ប៉ុន្តែយ៉ាងណាក្ដី អ្នកវិភាគនិយាយថា ឧស្សាហកម្មភស្តុភារសកល អាចនឹងរងគ្រោះ ប្រសិនបើការដឹកជញ្ជូនត្រូវបានរំខានបន្ថែមទៀត៕