នៅថ្ងៃពុធនេះ ទីក្រុងស៊ីដនីរបស់ប្រទេសអូស្រ្តាលី បានរងផលរំខានដោយសារតែព្យុះព្រិល ធ្វើឲ្យស្ថានភាពអាកាសធាតុត្រជាក់ខ្លាំងកើតមាននៅក្នុងរដ្ឋធានីរដ្ឋ New South Wales មួយនេះ ក្រោយមានភ្លៀងធ្លាក់ខ្លាំងនៅថ្ងៃបុណ្យណូអែល ។

 វីដេអូដែលថតបានដោយសាក្សី Ramna Zafar ឃើញភ្លៀងធ្លាក់ខ្លាំងលាយព្រិល និងដុំទឹកកកតូចៗ ធ្លាក់លើចិញ្ចើមផ្លូវនៅតំបន់ជាយក្រុងស៊ីដនី ។

 មន្ទីរឧតុនិយមអូស្រ្តាលី បានព្រមានពីលទ្ធភាពនៃភ្លៀងផ្គរន្ទះបោកបក់ឆ្លងកាត់ទីក្រុងស៊ីដនីនៅយប់ថ្ងៃពុធនេះផងដែរ ប៉ុន្តែការព្យាករណ៍បានឲ្យដឹងថា ភ្លៀងធ្លាក់នឹងលែងកើតមាននៅថ្ងៃព្រហស្បតិ៍ស្អែក ។ 

 គួរឲ្យដឹងថា ស្ថានភាពអាកាសធាតុត្រជាក់ កើតមាននៅតាមតំបន់ជាច្រើននៅតំបន់ឆ្នេរភាគខាងកើតអូស្រ្តាលី កាលពីថ្ងៃទី ២៥ និងថ្ងៃទី ២៦ ធ្វើឲ្យកើតមានព្យុះព្រិល និងព្យុះទឹកកក ។ 

 ដោយឡែក ខ្យល់បក់ខ្លាំងបានបក់បំប៉ើងដំបូលផ្ទះប្រជាពលរដ្ឋ និងរំលើងដើមឈើនៅតាមតំបន់រងផលប៉ះពាល់ធ្ងន់ធ្ងរ ហើយផ្ទះសម្បែងជាង ៩ម៉ឺនខ្នង គ្មានចរន្តអគ្គិសនីប្រើប្រាស់ ៕