ឧបនាយករដ្ឋមន្ត្រីរុស្ស៊ី លោក Alexander Novak នៅថ្ងៃពុធ (ទី២៧ ខែធ្នូ) នេះ បាននិយាយថា ការនាំចេញប្រេងរបស់រុស្ស៊ីស្ទើរតែទាំងអស់ ក្នុងឆ្នាំនេះ ត្រូវបានដឹកជញ្ជូនទៅកាន់ប្រទេសចិន និងឥណ្ឌា បន្ទាប់ពីទីក្រុងម៉ូស្គូបានឆ្លើយតបទៅនឹងទណ្ឌកម្មសេដ្ឋកិច្ចរបស់លោកខាងលិច ដោយផ្លាស់ប្តូរទិសដៅផ្គត់ផ្គង់យ៉ាងឆាប់រហ័សចេញពីតំបន់អឺរ៉ុប។

លោក Novak ដែលទទួលបន្ទុកផ្នែកថាមពលរបស់ប្រទេស បានប្រាប់ទូរទស្សន៍រដ្ឋ Rossiya-24 ថា ប្រទេសរុស្ស៊ីបានគេចផុតដោយជោគជ័យពីការដាក់ទណ្ឌកម្មលើប្រេងរបស់ខ្លួន ហើយបានបង្វែរលំហូរនាំចេញពីអឺរ៉ុបទៅកាន់ប្រទេសចិន និងឥណ្ឌាវិញ។

លោកបាននិយាយថា រុស្ស៊ីបានចាប់ផ្តើមបង្កើតទំនាក់ទំនងជាមួយបណ្តាប្រទេសអាស៊ីប៉ាស៊ីហ្វិករួចហើយ មុនពេលលោកខាងលិចដាក់ទណ្ឌកម្មប្រឆាំងនឹងទីក្រុងមូស្គូ បន្ទាប់ពីការចាប់ផ្តើមនៃជម្លោះ នៅប្រទេសអ៊ុយក្រែន ក្នុងខែកុម្ភៈ ឆ្នាំ២០២២។

លោកបានបន្តថា ភាគហ៊ុនរបស់អឺរ៉ុបនៃការនាំចេញប្រេងឆៅរបស់រុស្ស៊ី បានធ្លាក់ចុះមកនៅត្រឹមតែ ៤-៥ភាគរយប៉ុណ្ណោះ ពោលគឺធ្លាក់ប្រហែល ៤០-៤៥ភាគរយ។

លោក Novak បាននិយាយថា៖ «ដៃគូដ៏សំខាន់ ក្នុងស្ថានភាពបច្ចុប្បន្ន គឺប្រទេសចិន ដែលភាគហ៊ុនរបស់ពួកគេបានកើនឡើងដល់ប្រហែល ៤៥-៥០ភាគរយ ហើយជាការពិតណាស់ ឥណ្ឌា ដោយនៅមុននេះ មិនមានការផ្គត់ផ្គង់ជាសំខាន់ដល់ប្រទេសឥណ្ឌានោះទេ តែក្នុងរយៈពេល ២ឆ្នាំនេះ ភាគហ៊ុនសរុបនៃការផ្គត់ផ្គង់ទៅកាន់ប្រទេសឥណ្ឌា បានឡើងដល់ ៤០ភាគរយ»៕