មន្រ្តីទីភ្នាក់ងារជាតិមុខរបរ និងការងារ (NEA) បានឲ្យដឹងថា រហូតមកដល់ពេលនេះ ឃើញ​មាន​ក្រុមហ៊ុន​ជាច្រើននៅតែបន្តចុះឈ្មោះនៅទីភ្នាក់ងារជាតិមុខរបរ និងការងារ (NEA) នៃ​ក្រសួង​ការងារ និងបណ្តុះបណ្តាលវិជ្ជាជីវៈ ដើម្បីប្រកាសអំពីតម្រូវការកម្លាំងពលកម្មគ្រប់មុខតំណែង និង​គ្រប់​មុខជំនាញ។

លោក ឆោម សុខឿន ប្រធានមជ្ឈមណ្ឌលការងាររាជធានីភ្នំពេញ នៃទីភ្នាក់ងារជាតិមុខរបរ និង​ការងារ ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃទី២៨ ខែធ្នូ ឆ្នាំ២០២៣នេះ បាន​មានប្រសាសន៍ថា គិតក្នុងត្រីមាសទី៣ចុងក្រោយនេះ សម្រា​ប់​តែ​មជ្ឈ​មណ្ឌល​ការងារ​រាជ​ធានី​ភ្នំពេញ គឺមានបណ្តាក្រុមហ៊ុននៅតែបន្តចុះឈ្មោះ។ ដោយឡែក សម្រាប់ឆ្នាំថ្មី២០២៤ខាងមុខ ក៏​មាន​ក្រុម​ហ៊ុនបណ្តើរៗបានធ្វើការចុះឈ្មោះ ដែលនិយាយជារួម ភាគីនិយោជក​នៅតែ​មាន​តម្រូវ​ការ​កម្លាំង​ពលកម្ម។

លោកបានបញ្ជាក់ថា សព្វថ្ងៃនេះមជ្ឈមណ្ឌលការងាររាជធានីភ្នំពេញ ក៏ដូចជាតាមបណ្តាខេត្ត នៅ​តែ​បន្ត​សកម្មភាពផ្សព្វផ្សាយអំពីព័ត៌មានការងារដដែល ហើយសម្រាប់គន្លឹះដែលយុវជន សិស្ស និស្សិត បានទទួលឱកាសការងារ ក៏ដូចជាមិនទាន់ទទួលបានជោគជ័យហើយនោះ គឺ NEA នឹង​បន្ត​រៀបចំ​សម្របសម្រួលបន្ថែមទៀតដោយឥតគិតថ្លៃ ខណៈដែលយុវជនរាប់ពាន់ម៉ឺននាក់ បាន​កំពុ​ង​ត្រៀមខ្លួនដើម្បីចូលធ្វើការងារ ឬក៏ចង់ផ្លាស់ប្តូរការងារជាដើម។

សូមបញ្ជាក់ថា នៅថ្ងៃទី២៨ ខែធ្នូនេះ ទីភ្នាក់ងារជាតិមុខរបរ និងការងារ បានសហការជាមួយ ស.ស.យ.ក វិស័យការងារ និងបណ្តុះបណ្តាលវិជ្ជាជីវៈ បន្តរៀបចំវេទិកាការងារ និង​កម្ម​សិក្សា​ការងារ ដោយនាំយកឱកាសការងារជាង ២០០កន្លែង ពីក្រុមហ៊ុនធំៗចំនួន៣ រួមមាន៖ ក្រុមហ៊ុន តេលា , ក្រុមហ៊ុន DEVELOCUS និងសណ្ឋាគារ ខេវីអិល (KVL)។

ក្រុម​យុវជនដែលបានចូលរួមក្នុងវេទិកាការងារខាងលើនេះ បានឲ្យ ប៊ីធីវី ដឹងថា តាមរ​យៈក​ម្ម​វិធីនេះ​ នឹងផ្តល់ឱកាសកាងារល្អៗ និងផ្តល់នូវគន្លឹះសំខាន់ៗ ដើម្បីត្រៀមខ្លួនចូលទីផ្សារការងារ។ យុវជន​ទាំងនេះ បានទទួលស្គាល់ទៀតថា ការផ្សព្វផ្សាយអំពីព័ត៌មានទីផ្សារការងារសព្វថ្ងៃនេះ ពិត​ជា​មានភាពទូលំទូលាយជាងមុន ថែមទាំងផ្តល់ឱកាសកាន់តែជាច្រើន ក្នុង​ការ​ស្វែង​យល់​ពី​តម្រូវ​ការ​ការងារក្នុងពេលបច្ចុប្បន្ន និងអនាគត៕ អត្ថបទ៖ ឈិត បូរ៉ាវី