ភ្នំពេញ ៖ អង្គការស្នាមញញឹមកម្ពុជា និងក្រុមគ្រូពេទ្យស្ម័គ្រចិត្ត Northwest សហរដ្ឋអាមេរិក សហការជាមួយមូលនិធិស្តេនឌីស (Standish Foundation) នឹងផ្តល់ការវៈកាត់ដោយឥតគិតថ្លៃ ជូនអ្នកជំងឺពិការស្លឹកត្រចៀក មាត់ឆែប ក្រអូមឆែប និងពិការភាពមុខមាត់ផ្សេងៗ ចាប់ពីថ្ងៃទី៧-១២ ខែមករា ឆ្នាំ២០២៤ខាងមុខនេះ។

​បើតាមក្រុមគ្រូពេទ្យសម្របសម្រួល នៃអង្គការស្នាមញញឹមកម្ពុជា ថ្លែងប្រាប់BTV ព័ត៌មាន នាព្រឹកថ្ងៃទី២៨ ខែធ្នូ ឆ្នាំ២០២៣នេះថា អង្គការស្នាមញញឹមកម្ពុជា ដែលមានលោកជំទាវបណ្ឌិត ពេជ្រ ចន្ទមុន្នី ហ៊ុនម៉ាណែត ជាប្រធានក្រុមប្រឹក្សាភិបាល បានចុះកិច្ចព្រមព្រៀងជាមួយក្រសួងសុខាភិបាល ដើម្បីជួយវះកាត់ជូនអ្នកជំងឺមាត់ឆែប ក្រអូមឆែប និងពិការភាពមុខមាត់ផ្សេងៗ ដោយឥតគិតថ្លៃ។ គិតមកដល់ត្រឹមឆ្នាំ២០២៣នេះ អង្គការស្នាមញញឹមកម្ពុជា បានវះកាត់ជូនអ្នកជំងឺចំនួន៥៣៥៦ករណី។ ចំណែកការពិនិត្យអ្នកជំងឺ និងវៈកាត់ព្យាបាលនាពេលខាងមុខនេះ នឹងធ្វើការព្យាបាលវៈកាត់ផ្ទាល់នៅមជ្ឈមណ្ឌលស្នាមញញឹម នៃមនី្ទរពេទ្យមិត្តភាពខ្មែរ-សូវៀត ជាន់ទី៣ អគារវៈកាត់ទូទៅកុមារ និងកែលម្អ។ ដូច្នេះសូមអំពាវនាវប្រជាពលរដ្ឋ ដែលមានកូនកើតជំងឺបបូរមាត់ឆែប ជំងឺឆែបក្រអូមមាត់ និងបញ្ហាមុខខុសប្រក្រតីផ្សេងទៀត សូមមកទទួលការវៈកាត់ ព្យាបាលដោយឥតគិតថ្លៃ ជៀសវាងការបោះបង់កុមារចោល។

សូមរំលឹកផងដែរថា អង្គការស្នាមញញឹមកម្ពុជា (Smile Cambodia) ត្រូវបានបង្កើតឡើងបន្ទាប់ពី Operation Smile Cambodia បញ្ឈប់ប្រតិបត្តិការរបស់ខ្លួននៅក្នុងព្រះរាជាណាចក្រកម្ពុជា។ ជាមួយនឹងការប្តេជ្ញាចិត្តយ៉ាងម៉ឺងម៉ាត់ក្នុងការបន្តបុព្វហេតុដ៏ថ្លៃថ្នូរបស់ខ្លួន ផ្តល់ការវះកាត់ជូនអ្នកជំងឺមាត់ឆែប ក្រអូមមាត់ឆែប និងពិការភាពមុខមាត់ផ្សេងៗទៀត ដោយមិនគិតថ្លៃ អតីតក្រុមប្រឹក្សា អង្គការប្រតិបត្តិស្នាមញញឹមកម្ពុជា បានសម្រេចចិត្តបង្កើតអង្គការស្នាមញញឹមកម្ពុជា។ ស្នាមញញឹមកម្ពុជា ទទួលអាជ្ញាប័ណ្ណពីក្រសួងមហាផ្ទៃ ជាអង្គការក្នុងស្រុកនៅថ្ងៃទី22 ខែមិថុនា ឆ្នាំ2015។ អនុស្សរណៈនៃការយោគយល់គ្នាថ្មីមួយត្រូវបានចុះហត្ថលេខាជាមួយក្រសួងសុខាភិបាល នៅថ្ងៃទី10 ខែវិច្ឆិកា ឆ្នាំ2023។ ស្នាមញញឹមកម្ពុជា មានមន្ទីរពេទ្យមិត្តភាពខ្មែរ-សូវៀត ជាដៃគូដ៏រឹងមាំរបស់ខ្លួន តាមរយៈ MOU មួយ ដែលបានព្រមព្រៀងកាលពីថ្ងៃទី10 ខែកក្កដា ឆ្នាំ2015 ធ្វើឱ្យអង្គការស្នាមញញឹមកម្ពុជា អាចបន្តប្រតិបត្តិការប្រចាំខែនៅមជ្ឈមណ្ឌលស្នាមញញឹម។ អង្គការស្នាមញញឹមកម្ពុជា គឺជាសមាជិកនៃសម្ព័ន្ធស្នាមញញឹមអាស៊ី (Smile Asia Alliance) ដែលជាសម្ព័ន្ធអន្តរជាតិនៃអង្គការសប្បុរសធម៌ ផ្តល់ការវះកាត់ដោយឥតគិតថ្លៃជូនអ្នកជំងឺដែលមានបញ្ហាខូចមុខមាត់។ អង្គការស្នាមញញឹមកម្ពុជា ពឹងផ្អែកទាំងស្រុងលើទឹកចិត្តសប្បុរសរបស់អ្នកគាំទ្រទាំងក្នុង និងក្រៅស្រុក។ អ្នកអាចជួយនាំយកស្នាមញញឹមទៅកាន់ប្រជាជនកម្ពុជា ដែលខ្វះខាត តាមមធ្យោបាយជាច្រើន រួមមាន៖ ការបរិច្ចាកជាសាច់ប្រាក់ និងការរួមចំណែកដោយសប្បុរស ការស្ម័គ្រចិត្ត ការផ្សព្វផ្សាយពីសកម្មភាពវះកាត់ ការរៃអង្គាសថវិកា និងការប្រមូលអ្នកជំងឺ៕ អត្ថបទ ៖ រដ្ឋា