ប្រធានាធិបតីបារាំង លោក Emmanuel Macron កាលពីថ្ងៃពុធ បានបង្ហាញការព្រួយបារម្ភចំពោះនាយករដ្ឋមន្ត្រីអ៊ីស្រាអែល លោក Benjamin Netanyahu ជុំវិញការស្លាប់ និងរងរបួសជនស៊ីវិលយ៉ាងច្រើន និងភាពអាសន្នផ្នែកមនុស្សធម៌ដែលកំពុងកើនឡើង នៅក្នុងតំបន់ហ្កាហ្សា។

យោងតាមសេចក្តីថ្លែងការណ៍ ដែលចេញដោយវិមានប្រធានាធិបតី Elysee បាននិយាយថា នៅក្នុងការសន្ទនាតាមទូរស័ព្ទ លោក Macron បាននិយាយឡើងវិញពីកាតព្វកិច្ចរបស់អ៊ីស្រាអែល ក្នុងការការពារជនស៊ីវិល តម្រូវការបន្ទាន់ក្នុងការដឹកជញ្ជូនជំនួយទៅដល់ប្រជាជនតំបន់ហ្កា និងសារៈសំខាន់នៃការធ្វើការឆ្ពោះទៅរកបទឈប់បាញ់យូរអង្វែង ដោយដៃគូក្នុងតំបន់ និងអន្តរជាតិទាំងអស់។ 

លោក Macron និយាយថា ប្រទេសបារាំង នឹងធ្វើការជាមួយប្រទេសហ្ស៊កដានី នៅប៉ុន្មានថ្ងៃខាងមុខនេះ ដើម្បីអនុវត្តប្រតិបត្តិការមនុស្សធម៌នៅតំបន់ហ្កាហ្សា ដោយជំរុញឱ្យអ៊ីស្រាអែល មានចំណាត់ការចាំបាច់ទាំងអស់ដើម្បីបញ្ឈប់អំពើហិង្សា ដែលប្រព្រឹត្តដោយអ្នកតាំងលំនៅពិតប្រាកដមួយចំនួនប្រឆាំងជនស៊ីវិលប៉ាឡេស្ទីន និងផ្អាកគម្រោងការតាំងទីលំនៅណាមួយនៅក្នុងតំបន់ West Bank ដែលគំរាមកំហែងដំណោះស្រាយរដ្ឋពីរ។

យោងតាមក្រសួងសុខាភិបាលដែលមានមូលដ្ឋាននៅតំបន់ហ្កាហ្សាបានឲ្យដឹងថា ចំនួនអ្នកស្លាប់របស់ពលរដ្ឋប៉ាឡេស្ទីន ពីការវាយប្រហាររបស់អ៊ីស្រាអែលនៅតំបន់ហ្កាហ្សា បានកើនឡើងដល់ ជាង ២១.០០០ នាក់ ។