ទីភ្នាក់ងារសារព័ត៌មាន Shana ដែលពាក់ព័ន្ធជាមួយក្រសួងប្រេងអ៊ីរ៉ង់ បានរាយការណ៍ថា ប្រទេសអ៊ីរ៉ង់ និងអ៊ីរ៉ាក់កាលពីថ្ងៃពុធ បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការផ្តល់វគ្គ បណ្តុះបណ្តាលសម្រាប់កម្មករ ក្នុងវិស័យប្រេង។

របាយការណ៍ បាននិយាយថា អនុស្សរណៈយោគយល់គ្នានេះ ត្រូវបានចុះហត្ថលេខារវាងលោក Mehdi Ali-Madadi អនុរដ្ឋមន្ត្រីប្រេងរបស់ប្រទេសអ៊ីរ៉ង់សម្រាប់ការគ្រប់គ្រង និងអភិវឌ្ឍន៍ធនធានមនុស្ស និងលោក Bassim Mohammed Khudair អនុរដ្ឋមន្ត្រីក្រសួងប្រេងអ៊ីរ៉ាក់ទទួលបន្ទុកកិច្ចការស្រាវជ្រាវ នៅក្នុងរដ្ឋធានីតេអេរ៉ង់របស់ប្រទេសអ៊ីរ៉ង់។

រដ្ឋមន្ត្រីប្រេងអ៊ីរ៉ង់លោក Javad Owji និងសមភាគីអ៊ីរ៉ាក់ លោក Hayan Abdel-Ghani ក៏បានចូលរួមក្នុងពិធីចុះហត្ថលេខាផងដែរ។

ក្រោមអនុស្សរណៈយោគយល់គ្នា ដែលគ្រោងនឹងអនុវត្តក្នុងរយៈពេលប៉ុន្មានសប្តាហ៍ខាងមុខ ភាគីទាំងពីរ បានយល់ព្រមផ្តល់វគ្គបណ្តុះបណ្តាលសម្រាប់បុគ្គលិកក្រសួងប្រេងរបស់ប្រទេសទាំងពីរ ចាប់ផ្តើមកិច្ចសហប្រតិបត្តិការស្រាវជ្រាវ និងរៀបចំកិច្ចប្រជុំ តាមអ៊ីនធឺណិត។

នៅក្នុងកិច្ចប្រជុំរវាងគណៈប្រតិភូនៃប្រទេសទាំងពីរ នៅថ្ងៃតែមួយ លោក Owji បាននិយាយថា អ៊ីរ៉ង់ និងអ៊ីរ៉ាក់ អាចអនុវត្តគម្រោងរួមជាច្រើន ដោយផ្អែកលើធនធានអ៊ីដ្រូកាបូនដ៏ធំរបស់រដ្ឋទាំងពីរសម្រាប់ផលប្រយោជន៍ទ្វេភាគី។

លោក Abdel-Ghani សម្រាប់ផ្នែករបស់ខ្លួន បានលើកទឹកចិត្តក្រុមហ៊ុនអ៊ីរ៉ង់ឲ្យ«មានភាគហ៊ុន »នៅក្នុងគម្រោងផ្សេងគ្នារបស់ប្រទេសរបស់ខ្លួន រួមទាំងការអភិវឌ្ឍនៃអណ្តូងប្រេងរួមគ្នា។

រដ្ឋមន្ត្រីអ៊ីរ៉ាក់រូបនេះ បានចុះបញ្ជីការវិនិយោគរួមគ្នាលើការផលិតឧស្ម័ន និងការសាងសង់រោងចក្រចម្រាញ់ប្រេង ជាផ្នែកដ៏សំខាន់សម្រាប់កិច្ចសហប្រតិបត្តិការទ្វេភាគី។