ដោយមានកាន់ផ្ទាំងបដានៅនឹងដៃ ដែលសរសេរថា «ខ្ញុំសូមជូនពរឲ្យមានសេរីភាព ក្នុងឆ្នាំថ្មីនេះ» បាតុករជនជាតិស៊ែប៊ី នាង Nikolina Sindjelic បានចូលរួមជាមួយអ្នកគាំទ្រគណបក្សប្រឆាំងរាប់រយនាក់ ដែលបានចេញទៅតាមផ្លូវនានា នៅទីក្រុងបែលហ្គ្រាដ (Belgrade) កាលពីថ្ងៃពុធ (ទី២៧ ខែធ្នូ) ខណៈដែលការតវ៉ាជំទាស់នឹងលទ្ធផលបោះឆ្នោត បានឈានចូលដល់ថ្ងៃទី១០ ហើយ។ 

នាង Sindjelic បាននិយាយថា ក្រុមអ្នកតវ៉ាជឿថាពួកគេ មានសិទ្ធិក្នុងនាមជាជនស៊ីវិល ដែលអាចទាមទារឲ្យបើកបញ្ជីឈ្មោះអ្នកបោះឆ្នោត និងត្រួតពិនិត្យមើលឡើងវិញ។ សម្ព័ន្ធភាពគណបក្សស៊ែប៊ីប្រឆាំងនឹងអំពើហិង្សា ដែលឈរនៅលំដាប់ទី២ ក្នុងការបោះឆ្នោតសកលកាលពីដើមខែនេះ បានចោទប្រកាន់គណបក្សប្រជាជននិយមដែលកំពុងកាន់អំណាច គឺគណបក្សជឿនលឿនស៊ែប៊ី (SNS) ពីបទក្លែងបន្លំសន្លឹកឆ្នោត ដែលការចោទប្រកាន់នេះ ត្រូវបានអាជ្ញាធរបដិសេធ។

មេដឹកនាំបក្សប្រឆាំងម្នាក់ឈ្មោះ Marinika Tepic ដែលបានធ្វើកូដកម្មអត់អាហារ រួមជាមួយសហការី ៥នាក់ ក្រោយការបោះឆ្នោត បានចោទប្រកាន់អាជ្ញាធរថា រាប់បញ្ចូលមនុស្សស្លាប់ ក្នុងបញ្ជីបោះឆ្នោត ហើយនាំអ្នកបោះឆ្នោតមកពីបូស្នី និងកូសូវ៉ូ។

គណបក្សស៊ែប៊ីប្រឆាំងនឹងអំពើហិង្សា បានរៀបចំការតវ៉ាប្រចាំថ្ងៃ ជុំវិញលទ្ធផលបោះឆ្នោត នៅមុខគណៈកម្មការបោះឆ្នោត។ កាលពីថ្ងៃអាទិត្យ ទី២៤ ខែធ្នូ ការតវ៉ាបានក្លាយជាអំពើហិង្សា ហើយមនុស្ស ៣៨នាក់ ត្រូវបាននគរបាលចាប់ខ្លួន៕