ប្រទេសអូស្ត្រាលី បានបញ្ជាក់ នៅថ្ងៃព្រហស្បតិ៍នេះថា ពលរដ្ឋរបស់ខ្លួនពីរនាក់ បានស្លាប់នៅក្នុងការវាយប្រហារតាមអាកាសរបស់អ៊ីស្រាអែល នៅប្រទេសលីបង់ភាគខាងត្បូង ហើយបាននិយាយថា ខ្លួនកំពុងសម្លឹងមើលការអះអាងរបស់ក្រុមហេសបូឡាថា ពលរដ្ឋអូស្ត្រាលីម្នាក់ ដែលត្រូវបានសម្លាប់ មានទំនាក់ទំនងជាមួយក្រុមសកម្មប្រយុទ្ធនេះ។

រដ្ឋមន្ត្រីការបរទេសស្តីទី លោក Mark Dreyfus បាននិយាយក្នុងអំឡុងសន្និសីទសារព័ត៌មានមួយថា៖      «យើងនឹងបន្តធ្វើការសាកសួរអំពីមនុស្សពិសេសនេះ ដែលក្រុមហេសបូឡា បានអះអាងអំពីទំនាក់ទំនងនេះ»។

«ក្រុមហេសបូឡា បានអះអាងពីជនជាតិអូស្ត្រាលីម្នាក់នេះថា ជាអ្នកប្រយុទ្ធរបស់ខ្លួន។ ការស៊ើបអង្កេតរបស់យើង កំពុងបន្ត»។

លោក Dreyfus បាននិយាយថា ក្រុមហេសបូឡា ដែលជាក្រុមសកម្មប្រយុទ្ធលីបង់គាំទ្រដោយអ៊ីរ៉ង់ គឺជា «អង្គការភេរវកម្មដែលមាននៅក្នុងបញ្ជី» នៅក្នុងប្រទេសអូស្ត្រាលី ហើយវាជាបទល្មើសសម្រាប់ជនជាតិ   អូស្ត្រាលីណាមួយ ក្នុងការផ្តល់ជំនួយផ្នែកហិរញ្ញវត្ថុ ឬប្រយុទ្ធ នៅក្នុងក្រុមរបស់ខ្លួន។

សន្តិសុខលីបង់ និងប្រភពក្នុងស្រុក បានប្រាប់សារព័ត៌មានរ៉យទ័រ កាលពីថ្ងៃពុធថា បុរសជនជាតិលីបង់-អូស្ត្រាលីម្នាក់ ប្រពន្ធ និងបងប្រុសរបស់គាត់ ដែលជាសមាជិកក្រុមហេសបូឡា ត្រូវបានសម្លាប់ នៅក្នុងការវាយប្រហាររបស់អ៊ីស្រាអែល។