ក្រសួងការពារជាតិរបស់ប្រទេសចិន នៅថ្ងៃព្រហស្បតិ៍ (ទី២៨ ខែធ្នូ) បានចោទប្រកាន់រដ្ឋបាលរបស់កោះតៃវ៉ាន់ថា មានចេតនា «បំផ្លើស» ពីការគំរាមកំហែងផ្នែកយោធាពីប្រទេសចិន ដើម្បីទទួលបានការគាំទ្រ នៅមុនការបោះឆ្នោតរបស់កោះនេះ ដែលមានរយៈពេលត្រឹមតែជាង ២សប្តាហ៍ប៉ុណ្ណោះ។

ការបោះឆ្នោតជ្រើសរើសមេដឹកនាំកំពូល និងសភា នៅថ្ងៃទី១៣ ខែមករារបស់កោះតៃវ៉ាន់ នឹងជះឥទ្ធិពលដល់ទំនាក់ទំនងរបស់កោះនេះ ដែលត្រូវបានទាមទារដោយចិន ជាមួយទីក្រុងប៉េកាំង ដែលក្នុងរយៈពេល ៤ឆ្នាំកន្លងមកនេះ បានបង្កើនសម្ពាធផ្នែកយោធា ដើម្បីអះអាងដល់ទាមទារអធិបតេយ្យភាពរបស់ខ្លួន។

ក្នុងពេលដែលការបោះឆ្នោតកាន់តែខិតជិតមកដល់ កោះតៃវ៉ាន់បាននិងកំពុងរាយការណ៍អំពីយន្តហោះចម្បាំង និងនាវាចម្បាំងរបស់ចិន នៅជុំវិញកោះ ក៏ដូចជាបាឡុងឆ្លងកាត់ច្រកសមុទ្រតៃវ៉ាន់ដ៏រសើប ទោះបីជាយោធាលើកឡើងថា បាឡុងនោះទំនងជាមានគោលបំណងត្រួតពិនិត្យអាកាសធាតុក៏ដោយ។

ក្នុងសន្និសីទសារព័ត៌មានប្រចាំខែ នាទីក្រុងប៉េកាំង អ្នកនាំពាក្យក្រសួងការពារជាតិចិន លោក Wu Qian បាននិយាយថា រដ្ឋបាលរបស់កោះតៃវ៉ាន់ ត្រូវទទួលខុសត្រូវចំពោះភាពតានតឹងនេះ។ ដោយសំដៅទៅលើគណបក្សកាន់អំណាចរបស់កោះតៃវ៉ាន់ ដែលទីក្រុងប៉េកាំងចាត់ទុកថា ជាអ្នកបំបែកខ្លួននោះ លោក Wu បានប្រាប់ថា៖ «មន្ត្រីរបស់គណបក្សប្រជាធិបតេយ្យជឿនលឿន (DPP) មានចេតនាបំភ័ន្តពីអ្វី ដែលគេហៅថា «ការគំរាមកំហែងផ្នែកយោធាពីចិនដីគោក»។

លោក Wu បានបញ្ជាក់បន្ថែមថា៖ «ទង្វើនេះគឺដើម្បីស្វែងរកការឈ្នះឆ្នោតទាំងស្រុង»។ លោកចោទកោះតៃវ៉ាន់ថា បានប្រើសៀវភៅលេងល្បែងបោះឆ្នោតដែលធ្លាប់មាន ដើម្បីបង្កឲ្យមានការប្រឈមមុខដាក់គ្នា និងក្រឡុកការបោះឆ្នោត៕