ភ្នំពេញ ÷ ស្តង់របស់ក្រសួង ស្ថាប័ន និងអង្គភាពនីមួយៗ ដែលដាក់បង្ហាញនូវសមិទ្ធផលនានារបស់ខ្លួនសម្រាប់តាំងពិព័រណ៍នៅក្នុងបរិវេនវិមានឈ្នះ ឈ្នះ ក្នុងឱកាសប្រារព្ធពិធីខួប២៥ឆ្នាំនៃការបញ្ចប់សង្រ្គាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះ ឈ្នះ និងខួប៥ឆ្នាំនៃការសាងសង់វិមានឈ្នះ ឈ្នះ ត្រូវបានរៀបចំរួចរាល់នាថ្ងៃទី២៨ ខែធ្នូ ឆ្នាំ២០២៣នេះ ខណៈស្តង់នីមួយៗបានរំលេចនូវរូបភាពដ៏ គួរឲ្យទាក់ទាញនូវស្នាដៃរបស់ពួកគេ ដែលទទួលបានក្នុងរយៈពេល២៥ឆ្នាំមកនេះ ក្រោយកម្ពុជាមានសុខ សន្តិភាពពេញលេញនោះ។

 សូមបញ្ជាក់ថា ការរៀបចំពិព័រណ៍សមិទ្ធផល២៥ឆ្នាំ តាមរយៈនយោបាយឈ្នះ ឈ្នះ របស់ ក្រសួង-ស្ថាប័ន និងការតាំងពិព័រណ៍ផលិតផលទូទៅ និងម្ហូបអាហារ គឺបានចែកជា៤តំបន់ ដោយមានស្តង់ចំនួន ៥០០មកពីគ្រប់ក្រសួង ស្ថាប័នទាំងអស់។

ការប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយភាព ជោគជ័យនូវនយោបាយឈ្នះ ឈ្នះ និងការប្រារព្ធខួប៥ឆ្នាំ នៃការកសាងវិមានឈ្នះ ឈ្នះ នឹងប្រព្រឹត្តទៅ ក្រោមអធិបតីភាព សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នាថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០២៣នេះ។

 នយោបាយឈ្នះឈ្នះមានគន្លឹះសំខាន់៣យ៉ាងដែលជាស្នូលនៃដំណោះស្រាយ នោះគឺ៖ ការធានាអាយុជីវិតនិងរាងកាយ ការធានាអាជីពនិងមុខរបរ និងការធានាទ្រព្យសម្បត្តិនិងកម្មសិទ្ធិឯកជន។ រូបមន្តដ៏ស័ក្តិសិទ្ធិនេះផ្សំឡើងដោយស្នាដៃសម្តេចតេជោ ហ៊ុន សែន។ សន្តិភាពបានប្រែក្លាយតំបន់អតីតសមរភូមិទៅជាទីផ្សារ និងតំបន់អភិវឌ្ឍន៍ ប្រែក្លាយចម្ការមីនទៅជាចម្ការដំណាំ និងប្រែក្លាយការបែកបាក់ជាតិទៅជាការរួបរួមខ្មែរតែមួយក្រោមបាវចនា ជាតិ សាសនា ព្រះមហាក្សត្រ។ សន្តិភាពបានក្លាយជាចលករជំរុញល្បឿននៃការអភិវឌ្ឍន៍ឱ្យដើរលឿនស្លេវទៅមុខ។ សមិទ្ធផលទាំងឡាយដែលលេចឡើងចំពោះមុខយើងទាំងអស់សុទ្ធសឹងជាផ្លែផ្កានៃសុខសន្តិភាពដែលជាស្នាដៃឯករបស់សម្តេចតេជោ ហ៊ុន សែន បិតាស្ថាបនិកសន្តិភាពរបស់កម្ពុជា៕អត្ថបទ÷ បាន ចក់